ចិនកាត់ទោសពលរដ្ឋអាមេរិកឲ្យជាប់គុកអស់មួយជីវិត(AFP,SCMP,CNN)
ប្រទេសចិនបានកាត់ទោសពលរដ្ឋអាមេរិកអាយុ៧៨ឆ្នាំឱ្យជាប់ពន្ធនាគារអស់មួយជីវិតពីបទធ្វើចារកម្មដែលជាទង្វើមួយដែលអាចធ្វើអោយទំនាក់ទំនងកាន់តែតានតឹងជាមួយទីក្រុងវ៉ាស៊ីនតោន។លោក John Shing-Wan Leung ជាអ្នកកាន់លិខិតឆ្លងដែនអាមេរិក និងជាអ្នករស់នៅអចិន្ត្រៃយ៍ហុងកុង "ត្រូវបានកាត់ទោសពីបទចារកម្ម កាត់ទោសឱ្យជាប់គុកអស់មួយជីវិតនិងដកហូតសិទ្ធិនយោបាយអស់មួយជីវិត"។នេះបើយោងតាមសេចក្តីសម្រេចកាលពីថ្ងៃទី១៥ខែឧសភា ដោយតុលាការប្រជាជនកម្រិតមធ្យមនៅទីក្រុងSuzhouខេត្ត Jiangsu ។
Leung ត្រូវបានអាជ្ញាធរចិនចាប់ខ្លួនក្នុងខែមេសាឆ្នាំ២០២១នៅ Suzhou ជាទីក្រុងជាប់ព្រំដែនទីក្រុងShanghai។បន្ថែមពីលើការកាត់ទោសខាងលើ លោកLeungក៏មានទ្រព្យសម្បត្តិផ្ទាល់ខ្លួនរបស់គាត់ដែលត្រូវបានរឹបអូសដោយតុលាការ Suzhou ដែលមានតម្លៃ៥០០,០០០យ័ន (៧២,០០០ ដុល្លារ)ផងដែរ។ស្ថានទូតអាមេរិកនៅទីក្រុងប៉េកាំងបាននិយាយថា ខ្លួនបានដឹងអំពីការកាត់ទោសរបស់លោកLeung។អ្នកនាំពាក្យស្ថានទូតបានបដិសេធមិនធ្វើអត្ថាធិប្បាយជាក់លាក់ទេ។ប៉ុន្តែបានសង្កត់ធ្ងន់ថា "ក្រសួងការបរទេសសហរដ្ឋអាមេរិកមិនមានអាទិភាពអ្វីធំជាងសុវត្ថិភាព និងសន្តិសុខរបស់ពលរដ្ឋអាមេរិកនៅបរទេសនោះទេ"។ទោសធ្ងន់ៗបែបនេះគឺកម្រមានណាស់សម្រាប់ជនបរទេសនៅក្នុងប្រទេសចិន។ សេចក្តីសម្រេចរបស់តុលាការក្រុង Suzhou ទំនងជាធ្វើឲ្យខូចទំនាក់ទំនងរវាងក្រុងប៉េកាំង និងក្រុងវ៉ាស៊ីនតោនបន្ថែមទៀត។ទំនាក់ទំនងរវាងចិន និងសហរដ្ឋអាមេរិកគឺស្ថិតនៅចំណុចទាបបំផុតរបស់ពួកគេក្នុងរយៈពេលកន្លះសតវត្សចំពេលមានការប្រកួតប្រជែងកាន់តែខ្លាំងឡើងលើពាណិជ្ជកម្ម បច្ចេកវិទ្យាភូមិសាស្ត្រនយោបាយ និងឧត្តមភាពយោធា។ មន្ត្រីនៃប្រទេសទាំង២កំពុងបន្តទំនាក់ទំនងកម្រិតខ្ពស់ឡើងវិញចាប់តាំងពីជម្លោះលើនាវាអាកាសចិនបានរារាំងដល់កិច្ចខិតខំប្រឹងប្រែងដើម្បីជួសជុលទំនាក់ទំនងកាលពីដើមឆ្នាំនេះ។ប្រទេសចិនកាលពីខែមុនបានកែប្រែច្បាប់ប្រឆាំងចារកម្មរបស់ខ្លួនដើម្បីពង្រីកនិយមន័យនៃចារកម្មរបស់ខ្លួនដើម្បី "ហាមឃាត់ការផ្ទេរឯកសារព័ត៌មានសម្ភារៈឬវត្ថុណាមួយដែលទាក់ទងនឹងសន្តិសុខឬផលប្រយោជន៍ជាតិ"។នៅក្រោមច្បាប់ចារកម្មដែលគំរាមកំហែងដល់សន្តិសុខជាតិអាចនាំឱ្យមានការផ្តន្ទាទោសដាក់ពន្ធនាគារពី១០ឆ្នាំដល់ពន្ធនាគារអស់មួយជីវិត។ក្នុងខែដដែលនោះអាជ្ញាធរបានចោទប្រកាន់អ្នកកាសែតចិនដ៏ល្បីឈ្មោះDongYuyuពីបទចារកម្មជាង១ឆ្នាំបន្ទាប់ពីគាត់ត្រូវបានចាប់ខ្លួនខណៈកំពុងទទួលទានអាហារថ្ងៃត្រង់ជាមួយអ្នកការទូតជប៉ុននៅភោជនីយដ្ឋានមួយក្នុងទីក្រុងប៉េកាំង។អ្នកការទូតជប៉ុនរូបនេះ ត្រូវបានដោះលែងវិញបន្ទាប់ពីមានការសាកសួរជាច្រើនម៉ោង។ករណីថ្មីគួរឱ្យកត់សម្គាល់មួយពាក់ព័ន្ធនឹងការឃុំខ្លួនជនជាតិជប៉ុនម្នាក់ដែលធ្វើការឱ្យក្រុមហ៊ុនផលិតឱសថAstellas Pharma ក្នុងប្រទេសចិនកាលពីខែមីនា។ បុរសម្នាក់ដែលមានអាយុ៥០ឆ្នាំត្រូវបានចាប់ខ្លួននៅទីក្រុងប៉េកាំងពីបទរំលោភច្បាប់របស់ប្រទេសចិន។មន្ត្រីរដ្ឋាភិបាលជាន់ខ្ពស់ជប៉ុនម្នាក់បានតវ៉ា និងសុំឲ្យចិនដោះលែងគាត់៕
Post a Comment