អាមេ​រិក​សន្យាការ​ពា​រហ្វីលីពី​ននៅស​មុទ្រចិន​ខាងត្បូង​​(AFP,Reut​ers)

លោកប្រធានាធិបតីBidenបានសង្កត់ធ្ងន់លើការប្តេជ្ញាចិត្តរបស់សហរដ្ឋអាមេរិកក្នុងការការពារសម្ព័ន្ធមិត្តរបស់ខ្លួនគឺហ្វីលីពីនរួមទាំងនៅក្នុងសមុទ្រចិនខាងត្បូងនៅពេលទទួលសមភាគីរបស់លោកMarcosនៅសេតវិមាន។ថ្លែងនៅសេតវិមានក្នុងអំឡុងដំណើរទស្សនកិច្ចរយៈពេល៤ថ្ងៃទៅកាន់សហរដ្ឋអាមេរិកកាលពីថ្ងៃទី១ខែឧសភាប្រធានាធិបតីហ្វីលីពីនលោក Ferdinand Marcos បាននិយាយថាប្រទេសអាស៊ីអាគ្នេយ៍ស្ថិតនៅក្នុងតំបន់ដែល "ស្ថានភាពភូមិសាស្ត្រនយោបាយមានភាពស្មុគ្រស្មាញបំផុតនៅក្នុងពិភពលោកនាពេលបច្ចុប្បន្ន"។លោកMarcosបាននិយាយក្នុងអំឡុងកិច្ចប្រជុំមួយថា"ដូច្នេះវាជារឿងធម្មតាសម្រាប់ហ្វីលីពីនក្នុងការសម្លឹងមើលសម្ព័ន្ធមិត្តសន្ធិសញ្ញាតែមួយគត់របស់ខ្លួនដើម្បីពង្រឹងនិងកំណត់ឡើងវិញនូវទំនាក់ទំនងដែលយើងមាននិងតួនាទីរបស់យើងក្នុងការប្រឈមមុខនឹងភាពតានតឹងដែលកំពុងកើនឡើងនៅជុំវិញសមុទ្រខាងត្បូងនិងអាស៊ីប៉ាស៊ីហ្វិក" ។ ជាការឆ្លើយតបលោកBidenបានសង្កត់ធ្ងន់លើការប្តេជ្ញាចិត្តរបស់អាមេរិកចំពោះសម្ព័ន្ធមិត្តរបស់ខ្លួន។លោក Biden បាននិយាយថា “សហរដ្ឋអាមេរិករក្សាការប្តេជ្ញាចិត្តរបស់យើងចំពោះការការពារប្រទេសហ្វីលីពីនរួមទាំងនៅសមុទ្រចិនខាងត្បូងផងដែរ”។នេះមានន័យថា ការវាយប្រហារដោយប្រដាប់អាវុធណាមួយប្រឆាំងនឹងកងកម្លាំងប្រដាប់អាវុធហ្វីលីពីននាវាឬយន្តហោះនៅប៉ាស៊ីហ្វិក រួមទាំងសមុទ្រចិនខាងត្បូង នឹងបង្កឱ្យមានការប្តេជ្ញាចិត្តដើម្បីការពារប្រទេសហ្វីលីពីន មេដឹកនាំទាំង២បាននិយាយនៅក្នុងសេចក្តីថ្លែងការណ៍រួមស្តីពីការការពារជាតិ ក្រោមសន្ធិសញ្ញាការពារទៅវិញទៅមក ដែលចុះហត្ថលេខាដោយ ប្រទេសទាំង២ក្នុងឆ្នាំ១៩៥១។សេចក្តីថ្លែងការណ៍រួមក៏បានបញ្ជាក់ផងដែរថា មេដឹកនាំទាំង២“បានបញ្ជាក់ពីសារៈសំខាន់នៃការរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ដែលជាកត្តាមិនអាចខ្វះបានសម្រាប់សន្តិសុខនិងវិបុលភាពពិភពលោក”។លោកMarcosបានមកដល់សហរដ្ឋអាមេរិកនៅថ្ងៃទី៣០ខែមេសា ហើយកិច្ចប្រជុំរបស់គាត់ជាមួយលោក Biden នៅសេតវិមានគឺជាការផ្តោតសំខាន់នៃដំណើរទស្សនកិច្ចនេះ។ ហ្វីលីពីននាពេលថ្មីៗនេះបានយល់ព្រមអនុញ្ញាតឱ្យសហរដ្ឋអាមេរិកចូលទៅកាន់មូលដ្ឋានយោធាចំនួនបួនបន្ថែមទៀតក្រោមកិច្ចព្រមព្រៀងសហប្រតិបត្តិការការពារជាតិដែលប្រសើរឡើង។ ភាគីទាំង២ក៏បានធ្វើសមយុទ្ធយោធាដ៏ធំបំផុតមិនធ្លាប់មានរបស់ពួកគេក្នុងប៉ុន្មានសប្តាហ៍ថ្មីៗនេះ។មន្ត្រីអាមេរិកបាននិយាយថាក្នុងដំណើរទស្សនកិច្ចរបស់លោក Marcos មេដឹកនាំទាំង២នឹងឯកភាពគ្នាលើទិសដៅថ្មី ដើម្បីពង្រឹងកិច្ចសហប្រតិបត្តិការយោធានិងសេដ្ឋកិច្ច។ រដ្ឋបាល​អាមេរិក​ក៏​នឹង​បញ្ជូន​យន្តហោះ​ដឹក​ជញ្ជូន C-130 ចំនួន​៣​គ្រឿងនិង​បញ្ជូន​នាវា​ល្បាត​បន្ថែម​ទៀត​ទៅ​ហ្វីលីពីន។ប្រធានាធិបតី Marcos បានព្យាយាមពង្រឹងទំនាក់ទំនងដ៏កក់ក្តៅជាមួយទាំងសហរដ្ឋអាមេរិកនិងចិន ដែលកំពុងប្រកួតប្រជែងដណ្តើមឥទ្ធិពលនៅក្នុងឥណ្ឌូប៉ាស៊ីហ្វិក។ អ្នកជំនាញបាននិយាយថាសហរដ្ឋអាមេរិកមើលឃើញថាប្រទេសហ្វីលីពីនជាទីតាំងដ៏មានសក្តានុពលមួយសម្រាប់ដាក់ពង្រាយប្រព័ន្ធមីស៊ីល គ្រាប់រ៉ុក្កែតនិងកាំភ្លើងធំដើម្បីដោះស្រាយជាមួយនឹងឧប្បត្តិហេតុនៅក្នុងតំបន់។ទោះបីជាយ៉ាងណាក៏ដោយ លោក Marcos បានប្រាប់អ្នកសារព័ត៌មាននៅលើជើងហោះហើរទៅកាន់សហរដ្ឋអាមេរិកថា ប្រទេសចិនបានយល់ព្រមពិភាក្សាអំពីសិទ្ធិនេសាទនៅក្នុងសមុទ្រចិនខាងត្បូងហើយថាលោកនឹងមិនអនុញ្ញាតឱ្យហ្វីលីពីនក្លាយជាប្រភពនៃសកម្មភាពយោធាណាមួយឡើយ៕

ប្រធានាធិបតី​អាមេរិកJoe Biden(ស្ដាំ)និង​ប្រធានាធិបតី​ហ្វីលីពីន Ferdinand Marcos នៅ​សេតវិមាន​នៅ​ថ្ងៃ​ទី១ខែ​ឧសភា។រូបថត៖ AFP