លោកTrumpគូសបញ្ជាក់ផែនទីបង្ហាញផ្លូវដើម្បីបញ្ចប់ជម្លោះរុស្ស៊ី-អ៊ុយក្រែន
អតីតប្រធានាធិបតីអាមេរិកលោកDonald Trumpបាននិយាយថា ប្រសិនបើលោកជាប់ឆ្នោតឡើងវិញនៅឆ្នាំ២០២៤លោកអាចជួយរុស្ស៊ីនិងអ៊ុយក្រែនបញ្ចប់ជម្លោះ។អតីតប្រធានាធិបតីអាមេរិកDonald Trumpបាននិយាយដោយសំដៅលើលទ្ធភាពនៃការបញ្ចប់ជម្លោះរុស្ស៊ី និងអ៊ុយក្រែនថា"សម្រាប់ខ្ញុំនេះគឺជាការងាយស្រួលពេក" ។លោក Trump បានប្រាប់អ្នកគាំទ្រនៅរដ្ឋផ្លរីដាកាលពីថ្ងៃទី២១ខែមេសាថា"សូម្បីតែមុនពេលដែលខ្ញុំអង្គុយនៅក្នុងការិយាល័យរាងពងក្រពើ។ប្រសិនបើខ្ញុំជាប់ឆ្នោតឡើងវិញ ខ្ញុំអាចដោះស្រាយជម្លោះរុស្ស៊ី និងអ៊ុយក្រែន។ ខ្ញុំនឹងដោះស្រាយវាឱ្យបានលឿន" ។ លោកបានពន្យល់ថាលោកបានស្គាល់ទាំងប្រធានាធិបតីរុស្ស៊ី លោក Vladimir Putin និងប្រធានាធិបតី Volodymyr Zelensky។លោកជឿថាបើលោកចូលកាន់តំណែងរុស្ស៊ីនឹងមិនបើកប្រតិបត្តិការយោធាពិសេសនៅអ៊ុយក្រែនទេ។ខណៈពេលដែលរិះគន់គោលនយោបាយរបស់ប្រធានាធិបតីដែលកំពុងកាន់អំណាច Joe Biden លោក Trump បានពណ៌នាលោកថាជា "បេក្ខជនតែមួយគត់" ដែលអាចជួយសហរដ្ឋអាមេរិកឱ្យជៀសផុតពីសង្គ្រាមលោកលើកទី៣។នេះមិនមែនជាលើកទី១ទេដែលលោក Trump ជឿជាក់លើសមត្ថភាពរបស់គាត់ក្នុងការបញ្ចប់ជម្លោះនៅអ៊ុយក្រែន។កាលពីខែមុន លោកបានទទូចយ៉ាងហោចណាស់២ដងថា វាត្រូវចំណាយពេលត្រឹមតែ២៤ម៉ោងប៉ុណ្ណោះដើម្បីធ្វើការនេះ ប្រសិនបើលោកជាប់ឆ្នោតឡើងវិញ។កិច្ចចរចាសន្តិភាពរវាងរុស្ស៊ីនិងអ៊ុយក្រែនបានជាប់គាំងតាំងពីឆ្នាំមុនមកម្ល៉េះ។ ភាគីទាំង២បានបញ្ជាក់ថា ពួកគេនៅតែបើកការចរចា។ប៉ុន្តែភាគីទាំង២មិនទទួលយកលក្ខខណ្ឌរបស់ភាគីម្ខាងទៀតឡើយ។កាលពីខែតុលាឆ្នាំមុន ប្រធានាធិបតី Zelensky បានចុះហត្ថលេខាលើក្រឹត្យមួយដែលមិនព្រមចរចាជាមួយសមភាគីរុស្ស៊ីលោកPutinបន្ទាប់ពីទីក្រុងម៉ូស្គូបានបញ្ចូលខេត្តចំនួន៤របស់អ៊ុយក្រែន។ប្រទេសមួយចំនួនបានបង្ហាញពីឆន្ទៈរបស់ពួកគេក្នុងការសម្រុះសម្រួលដើម្បីបញ្ចប់អរិភាពក្នុងប្រទេសអ៊ុយក្រែន។ប៉ុន្តែរហូតមកដល់ពេលនេះមានការរីកចម្រើនតិចតួចដោយសារតែភាគីនានាមិនអាចយល់ព្រមលើស្ថានភាពនៃអ្នកសម្របសម្រួលរបស់ប្រទេសទាំងនេះ៕ប្រភពRT
អតីតប្រធានាធិបតីអាមេរិកលោកDonald Trump។AFP
Post a Comment