អូស្ត្រាលីហាមឃាត់TikTokលើឧបករណ៍រដ្ឋាភិបាល
ប្រទេសអូស្ត្រាលីដែលជាប្រទេសនៃសម្ព័ន្ធភាពស៊ើបការណ៍សម្ងាត់"Five Eyes"បានប្រកាសហាមឃាត់កម្មវិធីTikTokនៅលើឧបករណ៍របស់រដ្ឋាភិបាលដោយសារតែការព្រួយបារម្ភអំពីសុវត្ថិភាព។ប្រទេសអូស្ត្រាលីបានចូលរួមជាមួយបណ្តាប្រទេសលោកខាងលិចផ្សេងទៀតក្នុងការហាមឃាត់ការប្រើប្រាស់TikTokនៅលើឧបករណ៍រដ្ឋាភិបាលខណៈដែលកម្មវិធីវីដេអូដែលបង្កើតឡើងដោយក្រុមហ៊ុនចិននេះស្ថិតនៅក្រោមសម្ពាធកាន់តែខ្លាំងឡើងជុំវិញបញ្ហាសុវត្ថិភាពនិងឯកជនភាព។រដ្ឋមន្ត្រីក្រសួងយុត្តិធម៌អូស្ត្រាលីលោក Mark Dreyfus បានប្រកាសហាមប្រាមកាលពីថ្ងៃទី៤ខែមេសា បន្ទាប់ពីទទួលបានអនុសាសន៍ពីភ្នាក់ងារស៊ើបការណ៍សម្ងាត់និងសន្តិសុខ។ លោកបានបន្តថាបទបញ្ជានឹងចូលជាធរមានក្នុងពេលឆាប់តាមដែលអាចធ្វើទៅបាន។អូស្ត្រាលីបានក្លាយជាប្រទេសហាមឃាត់កម្មវិធីTikTokបន្ទាប់ពីប្រទេសអង់គ្លេស អាមេរិក និងកាណាដាបានប្រកាសវិធានការស្រដៀងគ្នានេះ។ទន្ទឹមនឹងនេះសភានូវែលសេឡង់ដែលជាសមាជិកនៃសម្ព័ន្ធភាពស៊ើបការណ៍សម្ងាត់ក៏បានបញ្ជាឱ្យលុបកម្មវិធីនេះចេញពីគ្រប់ឧបករណ៍ដែរ។ប្រទេសន័រវេសនិងសភាអឺរ៉ុបបានធ្វើការផ្លាស់ប្តូរស្រដៀងគ្នា។ កាលពីសប្តាហ៍មុនប្រភពបាននិយាយថាទីស្នាក់ការកណ្តាលរបស់អង្គការ NATOហាក់ដូចជាបានហាមឃាត់បុគ្គលិកពីការទាញយកកម្មវិធីទៅកាន់ឧបករណ៍ដែលផ្គត់ផ្គង់ដោយNATO ។រហូតមកដល់ពេលនេះមិនទាន់មានភស្តុតាងណាមួយដែលបង្ហាញថា រដ្ឋាភិបាលចិនមានសិទ្ធិចូលប្រើទិន្នន័យអ្នកប្រើប្រាស់ TikTok នោះទេ ហើយគ្មានរដ្ឋាភិបាលណាមួយចេញការហាមឃាត់លើកម្មវិធីនេះនៅលើឧបករណ៍ផ្ទាល់ខ្លួននោះដែរ៕ប្រភពGuardian
កម្មវិធីTikTokនៅលើទូរសព្ទដៃក្នុងរូបថតនេះថតនៅថ្ងៃទី១៣ខែកក្កដា ឆ្នាំ ២០២១។ រូបថត៖Reuters
Post a Comment