រុស្ស៊ីបើកដំណើរការប្រព័ន្ធការពារដែនអាកាសនៅគ្រីមៀ(Reuters,TASS,Avia)
មេដឹកនាំរដ្ឋាភិបាលគ្រីមៀលោក Sergey Aksyonov បាននិយាយថា ការការពារដែនអាកាសត្រូវបានធ្វើឱ្យសកម្ម។ប៉ុន្តែមិនបានបញ្ជាក់ពីគោលដៅរបស់កងកម្លាំងនោះទេ។លោកAksyonovប្រមុខរដ្ឋាភិបាលនៅឧបទ្វីបគ្រីមៀបាននិយាយថា"កងកម្លាំងការពារដែនអាកាសបាននិងកំពុងប្រតិបត្តិការលើឧបទ្វីបគ្រីមៀមិនមានអ្នកស្លាប់ឬការខូចខាតទេ។ខ្ញុំស្នើឱ្យអ្នកគ្រប់គ្នារក្សាភាពស្ងប់ស្ងាត់" ។លោកមិនបាននិយាយថាតើគោលដៅរបស់កងកម្លាំងការពារអាកាសគឺអ្វីទេ ហើយលោកក៏មិនបានបញ្ជាក់ពីទីតាំងនៃប្រតិបត្តិការយោធានោះដែរ។ប្រភពមិនបញ្ចេញឈ្មោះក្នុងតំបន់បាននិយាយថាវត្ថុមិនស្គាល់អត្តសញ្ញាណមួយត្រូវបានគេប្រទះឃើញនៅលើមេឃលើតំបន់គ្រីមៀនៅព្រឹកថ្ងៃទី២២ មេសា។ ភ្លាមៗនោះ កម្លាំងការពារដែនអាកាស បានសម្រេចចិត្តបាញ់ទម្លាក់ ហើយវត្ថុនោះត្រូវបានបំផ្លាញបន្ទាប់ពីការបាញ់បង្ហោះគ្រាប់មីស៊ីលចំនួន២លើក។ប្រជាពលរដ្ឋនៅសហគមន៍ក្បែរនោះបានរាយការណ៍ថាបានឮសំឡេងខ្លាំង។អ្នកជំនាញយោធានិងអាជ្ញាធរកំពុងស៊ើបអង្កេតដើម្បីកំណត់ពីប្រភពដើមនៃវត្ថុក៏ដូចជាគោលដៅនៃការវាយប្រហារ។រុស្ស៊ីបានចោទប្រកាន់យោធាអ៊ុយក្រែនម្តងហើយម្តងទៀតថាបានប្រើប្រាស់យន្តហោះគ្មានមនុស្សបើកដើម្បីវាយប្រហារហេដ្ឋារចនាសម្ព័ន្ធនៅលើឧបទ្វីបគ្រីមៀ។ការវាយប្រហារកាលពីថ្ងៃទី២០ ខែមីនាបានធ្វើឲ្យមនុស្សម្នាក់រងរបួសនិងខូចខាតអគារជាច្រើនខ្នង។មន្ត្រីគ្រីមៀបាននិយាយថាការវាយឆ្មក់នេះគឺសំដៅទៅលើជនស៊ីវិល ដោយសារតែតំបន់នោះមិនមានកន្លែងយោធា។ជាមួយគ្នានេះ អគ្គនាយកដ្ឋានការពារជាតិអ៊ុយក្រែនបាននិយាយថាការផ្ទុះនេះបានបំផ្លាញ នាវាចម្បាំង Kalibr-NK របស់រុស្ស៊ី ដែលកំពុងដឹកជញ្ជូនទៅកាន់សមុទ្រខ្មៅ តាមផ្លូវដែក។ប៉ុន្តែមិនបានអះអាងទទួលខុសត្រូវចំពោះការវាយប្រហារនេះទេ។កាលពីថ្ងៃទី២២ខែមីនារុស្ស៊ីបានចោទប្រកាន់អ៊ុយក្រែនថាបានប្រើប្រាស់យន្តហោះគ្មានមនុស្សបើកដែនសមុទ្រដើម្បីវាយប្រហារកំពង់ផែ Sevastopol។ប៉ុន្តែការវាយប្រហារនេះត្រូវបានបញ្ឈប់ដោយកងនាវាចរសមុទ្រខ្មៅ។កាលពីថ្ងៃទី២៩ខែមីនារុស្ស៊ីបានអះអាងថាបានបាញ់ទម្លាក់យន្តហោះគ្មានមនុស្សបើកពីលើទីក្រុងSimperopolដែលជាទីក្រុងស្ថិតនៅកណ្តាលគ្រីមៀហើយបានចោទប្រកាន់អ៊ុយក្រែនថាជាអ្នកនៅពីក្រោយការវាយប្រហារនេះ។រុស្ស៊ីបានបញ្ចូលឧបទ្វីបគ្រីមៀបន្ទាប់ពីការធ្វើប្រជាមតិក្នុងឆ្នាំ ២០១៤។ ទីក្រុងម៉ូស្គូនិយាយថាលទ្ធផលប្រជាមតិបង្ហាញថាប្រជាជន គ្រីមៀភាគច្រើនចង់ជាផ្នែកមួយនៃប្រទេសរុស្ស៊ី។ប៉ុន្តែអ៊ុយក្រែន និងបណ្តាប្រទេសលោកខាងលិចចាត់ទុកទង្វើនេះគឺខុសច្បាប់។វិមានក្រឹមឡាំងបានទាមទារឱ្យអ៊ុយក្រែនទទួលស្គាល់អធិបតេយ្យភាពរបស់រុស្ស៊ីលើតំបន់គ្រីមៀនិងតំបន់ផ្សេងទៀតដែលទីក្រុងមូស្គូបញ្ចូលជាលក្ខខណ្ឌនៃសន្តិភាព។ ក្រុងគៀវបាននិយាយថាខ្លួននឹងមិនចរចាសន្តិភាពទេ លុះត្រាតែរុស្ស៊ីចាកចេញពីទឹកដីទាំងអស់ដែលខ្លួនគ្រប់គ្រងក្នុងអ៊ុយក្រែន រួមទាំងតំបន់គ្រីមៀ៕
ប្រព័ន្ធការពារដែនអាកាសS-400ត្រូវបានរុស្ស៊ីដាក់ពង្រាយទៅកាន់ឧបទ្វីប គ្រីមៀក្នុងឆ្នាំ២០១៨។ រូបថត៖ RIA Novosti
Post a Comment