ដាណឺ​​​ម៉ាក​និងហូ​ឡង់ផ្តល់​រ​ថក្រោះLeopard2ដ​​ល់អ៊ុយក្រែ​ន​១៤គ្រឿង(AFP,R​eute​rs​,B​BN)

 ប្រទេសដាណឺម៉ាកបានប្រកាសថាខ្លួនរួមជាមួយប្រទេសហូឡង់នឹងប្រគល់រថក្រោះLeopard2ចំនួន១៤គ្រឿងទៅកាន់ប្រទេសអ៊ុយក្រែននៅដើមឆ្នាំក្រោយ។រដ្ឋមន្ត្រីការពារជាតិដាណឺម៉ាក Troels Lund Poulsen បាននិយាយនៅថ្ងៃនេះថា"វាមានសារៈសំខាន់ខ្លាំងណាស់ចំពោះក្តីសង្ឃឹមនៃសន្តិភាពនិងសន្តិសុខអឺរ៉ុបដែលយើងមិនអាចអនុញ្ញាតឱ្យអ៊ុយក្រែនប្រយុទ្ធតែម្នាក់ឯងបានទេ"។យោងតាមសេចក្តីថ្លែងការណ៍រួមរបស់ប្រទេសទាំង២រថក្រោះLeopard2A4ដែលត្រូវទិញពីភាគីទី៣ត្រូវបានគេរំពឹងថានឹងដឹកជញ្ជូននៅក្នុងត្រីមាសទី១នៃឆ្នាំ២០២៤។ដាណឺម៉ាកក៏បានសន្យាថានឹងបញ្ជូនរថក្រោះ Leopard 1ដល់ទៅ១០០គ្រឿង។​ បើយោងតាមលោក Poulsen យ៉ាងហោចណាស់៨០គ្រឿងនឹងត្រូវបញ្ជូនទៅប្រទេសអ៊ុយក្រែននៅចុងឆ្នាំ ២០២៣។លោកបាននិយាយថា"យើងចង់ក្លាយជាម្ចាស់ជំនួយដ៏ធំបំផុតមួយ ពីព្រោះមិត្តរបស់យើងនៅអ៊ុយក្រែនត្រូវតែទទួលបានការគាំទ្រអតិបរមា"។កាលពីខែកុម្ភៈ ដាណឺម៉ាក អាល្លឺម៉ង់ និងហូឡង់បានប្រកាសថា ពួកគេនឹងប្រមូលធនធានដើម្បីយករថក្រោះLeopard 1A5 ចាស់យ៉ាងហោចណាស់១០០គ្រឿងពីឃ្លាំងឧស្សាហកម្មដោយបញ្ជូនពួកគេទៅអ៊ុយក្រែននៅឆ្នាំនេះនិងឆ្នាំក្រោយ។Leopard 2 គឺជារថក្រោះប្រយុទ្ធជំនាន់ទី៣ដែលត្រូវបានបង្កើតឡើងក្នុងទសវត្សរ៍ឆ្នាំ ១៩៧០សម្រាប់កងទ័ពអាល្លឺម៉ង់ខាងលិចហើយបានចូលបម្រើការងារក្នុងឆ្នាំ ១៩៧៩។ រថយន្តនេះត្រូវបានបំពាក់ដោយកាំភ្លើងធំទំហំ១២០មីលីម៉ែត្រ ផ្ទុកពាសដែកដើម្បីទប់ទល់នឹងគ្រាប់ផ្លោង។កំណែក្រោយបានបន្ថែមគ្រឿងសឹកស្មុគស្មាញ។ប្រទេសអាល្លឺម៉ង់បានសាងសង់រថក្រោះ Leopard 2 ជាង ៣,៦០០គ្រឿងដែលកំពុងបម្រើការជាមួយកងទ័ពអាល្លឺម៉ង់ និងប្រទេសចំនួន១៣នៅអឺរ៉ុបព្រមទាំងប្រទេសជាច្រើននៅក្រៅតំបន់។ប្រទេសអាល្លឺម៉ង់នៅចុងខែមករាបានអនុម័តការប្រគល់រថក្រោះLeopard 2 ទៅកាន់អ៊ុយក្រែន ហើយបានយល់ព្រមឱ្យប្រទេសផ្សេងទៀតធ្វើដូចគ្នា។ គិតត្រឹមដើមខែមេសា អ៊ុយក្រែនបានទទួលរថក្រោះចំនួន៥៧ ក្នុងចំណោមរថក្រោះ២៩៣ដែលបណ្តាប្រទេសលោកខាងលិចបានសន្យាថានឹងប្រគល់ឱ្យទីក្រុងគៀវនៅឆ្នាំនេះ។កាលពីខែមុន អាល្លឺម៉ង់ និងអង់គ្លេសបានប្រគល់រថក្រោះ Leopard ១៨គ្រឿង និងរថក្រោះ Challenger 2 ចំនួន១៤គ្រឿង៕

ទាហាន​អ៊ុយក្រែននិង​ប៉ូឡូញ​ជិះ​រថក្រោះ Leopard 2A4អំឡុង​ពេល​ហ្វឹកហាត់​នៅ​ក្រុង Swietoszow ប្រទេស​ប៉ូឡូញ។ រូបថត៖AFP