ICJស្នើក្រុមហ៊ុនហ្វេសប៊ុកពិនិត្យករណីសម្តេចហ៊ុន សែនប្រើប្រាស់សម្តីហិង្សាតាមបណ្តាញសង្គម
គណៈកម្មាធិការនៃក្រុមអ្នកជំនាញច្បាប់អន្តរជាតិICJស្នើឱ្យក្រុមហ៊ុនMeta ពិនិត្យលើករណីរបស់សម្តេចនាយករដ្ឋមន្ត្រី ហ៊ុន សែនដែលបានប្រើប្រាស់ពាក្យពេចន៍ហិង្សាតាមប្រព័ន្ធផ្សព្វផ្សាយសង្គមហ្វេសប៊ុកដែលជាវេទិកាសម្តេចយកទៅគំរាមកំហែងដៃគូប្រកួតនយោបាយរបស់ខ្លួន។ សម្រាប់ អង្គការក្រៅរដ្ឋាភិបាលដែលធ្វើលើការតស៊ូមតិនិងសិទ្ធិមនុស្សខាងលើនេះចាត់ទុកថាសម្តីហិង្សារបស់សម្តេចហ៊ុន សែន គឺជាក្តីកង្វល់មួយដែលតម្រូវឱ្យក្រុមហ៊ុនមេត្តាពិនិត្យឱ្យបានម៉ត់ចត់។ក្នុងសេចក្តីថ្លែងការណ៍ចំនួន៥សន្លឹករបស់គណៈកម្មាធិការនៃក្រុមអ្នកជំនាញច្បាប់អន្តរជាតិ ICJ ដែលផ្ញើទៅកាន់ក្រុមហ៊ុនមេតាគឺICJ តម្រូវឱ្យក្រុមហ៊ុន មេតាវាយតម្លៃលើករណីប្រើប្រាស់សម្តីហិង្សារបស់សម្តេចនាយករដ្ឋមន្ត្រី ហ៊ុនសែនតាមប្រព័ន្ធផ្សាយផ្សព្វសង្គមឱ្យស្របទៅតាមច្បាប់និងស្តង់ដារសិទ្ធិមនុស្សអន្តរជាតិ ពិសេសឱ្យអនុលោមទៅតាម គោលការណ៍នៃកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយ (ICCPR)ក៏ដូចជាស្របតាមគោលការណ៍ណែនាំរបស់អង្គការសហប្រជាជាតិស្តីពីធុរកិច្ចនិងសិទ្ធិមនុស្ស។ក្នុងពិធីបើកការដ្ឋានសាងសង់ពង្រើក និងលើកកម្ពស់គុណភាពកំណាត់ផ្លូវជាតិលេខ៧ពីស្គន់ទៅក្រុងកំពង់ចាមកាលពីថ្ងៃទី០៨ខែមករាសម្តេចហ៊ុនសែនបានព្រមានចាត់វិធានការតាមផ្លូវច្បាប់និងប្រើប្រាស់អំណាចរបស់សម្តេចកម្ចាត់កម្លាំងអ្នកនយោបាយណាមួយដែលហ៊ានចេញមុខវាយប្រហារគណបក្សប្រជាជនកម្ពុជា។ត្រង់ចំណុចនេះ សម្តេចហ៊ុនសែនសង្កត់ធ្ងន់ថាសម្តេចនឹងមិនឱ្យបុគ្គលណាមួយចោទប្រកាន់បក្សសម្តេចថាជាចោរមួយជីវិតឡើយហើយសម្តេចនឹងត្រូវបញ្ចប់វប្បធម៌ឡាំប៉ាក្រោយការបោះឆ្នោត។បើតាមវីដេអូផ្សាយផ្ទាល់ចេញពីគេហទំព័ររបស់សម្តេចហ៊ុន សែននៅថ្ងៃដដែលនោះសម្តេចក៏បានអះអាងថា ជម្រើសដែលលោកត្រៀមអនុវត្តចំពោះអ្នកប្រឆាំងគឺតាមផ្លូវច្បាប់ និងការប្រើដំបង។ក្រោយសម្តេចនាយករដ្ឋមន្ត្រីថ្លែងសារបែបនេះ អង្គការអន្តរជាតិICJចាត់ទុកថាជាសម្តីហិង្សានិងមានចេតនាគំរាមកំហែងដល់ដៃគូនយោបាយស្របពេលដែលស្ថានភាពនៃសិទ្ធមនុស្ស និងលទ្ធិប្រជាធិបតេយ្យក្នុងប្រទេសកម្ពុជាមុនការបោះឆ្នោតថ្នាក់ជាតិនាខែកក្តដាឆ្នាំ២០២៣ខាងមុខកំពុងបន្តដាំក្បាលចុះ។តាមសេចក្តីថ្លែងការណ៍ដដែល ICJ សង្កេតឃើញថាសម្តេចហ៊ុន សែន និងក្រុមអាជ្ញាធរ បន្តសកម្មភាពយ៉ាងសកម្មដើម្បីបំបិទសម្លេងអ្នកប្រឆាំងតាមរយៈការថ្លែងសារគំរាមឬព្រមានចាប់ខ្លួនចំពោះអ្នកដែលហ៊ានរិះគន់មកលើសម្តេចក៏ដូចជាគណបក្សរបស់សម្តេច។ ខណៈ ICJ ព្រួយបារម្ភថា ការរំលោភសិទ្ធិមនុស្ស និងការបង្ក្រាបអ្នកប្រឆាំងនឹងបន្តកើនឡើងមុនការបោះឆ្នោតជ្រើសតាំងតំណាងរាស្ត្រនីតិកាលទី៧នាខែកក្តដា ឆ្នាំ២០២៣។តែយ៉ាងណា នៅថ្ងៃចន្ទម្សិលមិញក្នុងពិធីសម្ពោធមន្ទីរពេទ្យមួយក្នុងខេត្តត្បួងឃ្មុំក្រោមជំនួយរបស់ជប៉ុនសម្តេចហ៊ុនសែនបានឆ្លើយតបថាសម្តេចមិនប្រើពាក្យពេចន៍ហិង្សាអ្វីឡើយ។ផ្ទុយទៅវិញសម្តេចប្រើតែច្បាប់មួយមុខប៉ុណ្ណោះ។សម្រាប់លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា រាល់ពាក្យសម្តីធ្ងន់ៗរបស់សម្តេចនាយករដ្ឋមន្ត្រីនៅលើតាមបណ្តាញសង្គមនាពេលកន្លងមកគឺដើម្បីកម្ចាត់ក្រុមប្រឆាំងជ្រុលនិយមមួយចំនួនដែលមានចេតនាទាញកម្ពុជាឱ្យធ្លាក់ចូលវិបត្តិសង្គ្រាមនិងម្យ៉ាងវិញទៀត ដើម្បីធានាបានការបោះឆ្នោតថ្នាក់ជាតិឱ្យមានភាពរលូន៕RFI
សម្តេចនាយករដ្ឋមន្ត្រី ហ៊ុន សែនថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យជាង ៦ពាន់នាក់ នៅថ្ងៃទី១៧ ខែតុលា។រូបភាព៖asianews
Post a Comment