មន្ត្រីសហភាពអឺរ៉ុបអំពាវនាវឱ្យមានការល្បាតនៅច្រកសមុទ្រតៃវ៉ាន់
លោកJosep Borrellមន្ត្រីជាន់ខ្ពស់ហភាពអឺរ៉ុបបានអំពាវនាវឱ្យមានការល្បាតនៅក្នុងច្រកសមុទ្រតៃវ៉ាន់ដើម្បីបង្ហាញពីការប្តេជ្ញាចិត្តរបស់អឺរ៉ុបចំពោះសេរីភាពនៃការធ្វើនាវាចរណ៍នៅក្នុងតំបន់។លោកបាននិយាយថាតៃវ៉ាន់«មានអត្ថន័យសម្រាប់យើងទាំងផ្នែកសេដ្ឋកិច្ចពាណិជ្ជកម្មនិងបច្ចេកវិទ្យា»។ "នោះហើយជាមូលហេតុដែលខ្ញុំអំពាវនាវឱ្យកងនាវាចរអឺរ៉ុបដើរល្បាតតាមច្រកសមុទ្រតៃវ៉ាន់ដើម្បីបង្ហាញពីការប្តេជ្ញាចិត្តរបស់យើងចំពោះសេរីភាពនៃការធ្វើនាវាចរណ៍នៅក្នុងតំបន់ដ៏សំខាន់នេះ"។ការអត្ថាធិប្បាយរបស់លោក Borrell មន្ត្រីសហភាពអឺរ៉ុបទទួលបន្ទុកគោលនយោបាយការបរទេសត្រូវបានធ្វើឡើងនៅក្នុងអត្ថបទមួយនៅក្នុងកាសែតបារាំង Journal Du Dimanche ចេញផ្សាយនៅថ្ងៃទី ២៣ខែមេសា។ វាបានបន្លឺឡើងនូវចំណុចមួយដែលលោកបានធ្វើកាលពីសប្តាហ៍មុន ដោយបញ្ជាក់ពីសារៈសំខាន់របស់តៃវ៉ាន់ចំពោះអឺរ៉ុប។ប្រទេសចិនកាលពី២សប្តាហ៍មុនបានធ្វើសមយុទ្ធយោធារយៈពេល៣ថ្ងៃនៅជុំវិញកោះតៃវ៉ាន់ជាការឆ្លើយតបទៅនឹងកិច្ចប្រជុំរវាងមេដឹកនាំកោះ Tsai Ing-wen និងប្រធានសភាតំណាងសហរដ្ឋអាមេរិក Kevin McCarthy ។នៅថ្ងៃទី ១៨ខែមេសានៅក្នុងសុន្ទរកថាបើកការជជែកដេញដោលលើប្រទេសចិនក្នុងសភាអឺរ៉ុប លោក Borrellបានសង្កត់ធ្ងន់ថាតៃវ៉ាន់គឺជា"ផ្នែកនៃខ្សែក្រវាត់ភូមិសាស្ត្ររបស់ EU ដើម្បីធានាសន្តិភាព" ។ប្រធានាធិបតីបារាំងលោក Emmanuel Macron បន្ទាប់ពីដំណើរទស្សនកិច្ចទៅកាន់ទីក្រុងប៉េកាំងកាលពីដើមខែនេះបាននិយាយថាអឺរ៉ុបមិនគួរ"ធ្វើតាម"សហរដ្ឋអាមេរិកឬចិនលើបញ្ហាតៃវ៉ាន់ដើម្បីជៀសវាងការជាប់ពាក់ព័ន្ធនៅក្នុង"វិបត្តិដែលមិនមែនជារបស់យើង" ។ការលើកឡើងរបស់លោកបានទាក់ទាញការរិះគន់ពីអ្នកនយោបាយមួយចំនួនទាំងនៅអាមេរិកនិងសហភាពអឺរ៉ុប។ ចិនបានអះអាងថា តៃវ៉ាន់ជាខេត្តមួយដែលរង់ចាំការបង្រួបបង្រួមគ្នាឡើងវិញ ហើយមិនបានច្រានចោលការប្រើប្រាស់កម្លាំងនោះទេ។ ទន្ទឹមនឹងនេះ តៃវ៉ាន់ទទូចថាមានតែប្រជាជនរបស់ខ្លួនទេដែលអាចសម្រេចអនាគតកោះនេះ៕ប្រភពAFP
លោក Borrell មន្ត្រីសហភាពអឺរ៉ុបទទួលបន្ទុកគោលនយោបាយការបរទេស។Reuters
Post a Comment