រដ្ឋមន្រ្តីក្រសួងមហាផ្ទៃដឹកនាំកិច្ចប្រជុំស្តីពីការលាងលុយកខ្វក់ដើម្បីធ្វើបច្ចុប្បន្នភាព
រដ្ឋមន្រ្តីក្រសួងមហាផ្ទៃនិងជាប្រធានគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់និងហិរញ្ញប្បទានភេវរកម្ម(គ.ស.ហ.)សម្តេចស ខេងបានដឹកនាំកិច្ចប្រជុំស្ដីពីការលាងលុយកខ្វក់ដើម្បីធ្វើបច្ចុប្បន្នភាពពីម្សិលមិញនៅទីស្ដីការក្រសួងមហាផ្ទៃ។សម្តេចស ខេងបានថ្លែងថា ក្នុងរយៈពេល២ឆ្នាំកន្លងមកនេះថ្នាក់ដឹកនាំចំណុះគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់និងហិរញ្ញប្បទានភេវរកម្មបានខិតខំបំពេញការងារយ៉ាងល្អប្រសើរ ទោះបីជាកម្ពុជាប្រឈមនឹងផលប៉ះពាល់នានាដែលបង្កឡើងដោយសារជំងឺកូវីដ-១៩និងមានភាពមមាញឹកក្នុងការងារពាក់ព័ន្ធការបោះឆ្នោតជ្រើសរើសក្រុមប្រឹក្សាឃុំសង្កាត់ក៏ដូចជាគ្រោះទឹកជំនន់និងការរៀបចំកិច្ចប្រជុំកំពូលអាស៊ាន ព្រមទាំងកិច្ចប្រជុំអន្តរជាតិនានាក៏ដោយ។សម្តេចបានបញ្ជាក់ថាកិច្ចខិតខំប្រឹងប្រែងរបស់គណៈកម្មាធិការសម្របសម្រួលថ្នាក់ជាតិថ្នាក់ជាតិប្រឆាំងការសម្អាតប្រាក់និងហិរញ្ញប្បទានភេវរកម្មគឺបានទទួលសមិទ្ធផលការងារដ៏គួរឱ្យកត់សម្គាល់នោះគឺការឈានទៅសម្រេចការដកកម្ពុជាពីបញ្ជីប្រផេះប្រឆាំងការសម្អាតប្រាក់ជាផ្លូវការដោយអង្គការ FATF។សម្តេចនិយាយថា៖«ការដកកម្ពុជាចេញពីបញ្ជីប្រផេះនេះគឺមានតម្លៃស្មើនឹងផ្នែកមួយនៃអាយុជីវិតជាតិរួមទាំងផ្នែកសេដ្ឋកិច្ចនិងនយោបាយថែមទៀត»។សម្តេចស ខេង បានជំរុញឱ្យគណៈកម្មាធិការសម្របសម្រួលថ្នាក់ជាតិថ្នាក់ជាតិប្រឆាំងការសម្អាតប្រាក់និងហិរញ្ញប្បទានភេវរកម្មត្រូវតែបន្តការប្ដេជ្ញាចិត្តរក្សាឱ្យបានស្ថានភាពល្អប្រសើរតាមរយៈការរួមគ្នាបំពេញភារកិច្ចប្រកបដោយទំនួលខុសត្រូវ។សម្តេចតែងណែនាំដល់គណៈបញ្ជាការឯកភាពរដ្ឋបាលរាជធានីខេត្តនិងនគរបាលយុត្តិធម៌ត្រូវចូលរួមលុបបំបាត់បទល្មើសលាងសម្អាតប្រាក់និងហិរញ្ញប្បទានភេវរកម្មនិងហិរញ្ញប្បទានដល់ការរីកសាយអាវុធមហាប្រល័យ ប្រយុទ្ធប្រឆាំងនិងបង្ក្រាបបទល្មើសជួញដូរមនុស្សគ្រប់ទម្រង់ ការផលិតនិងចែកចាយគ្រឿងញៀននិងការលេងល្បែងស៊ីសងគ្រប់ប្រភេទជាដើម។ខ្មែរថាមស៍ មិនអាចទាក់ទងលោក ខៀវ សុភ័គ អ្នកនាំពាក្យក្រសួងមហាផ្ទៃដើម្បីបញ្ជាក់បន្ថែមលើរឿងនេះបានទេពីម្សិលមិញ។លោក ជា ចាន់តូ អនុប្រធានអចិន្ត្រៃនៃគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់និងហិរញ្ញប្បទានភេវរកម្មបានធ្វើរបាយការណ៍អំពីសកម្មភាពការងាររបស់ គ.ស.ហ.និងទិសដៅការងារសំខាន់ៗមួយចំនួនទៀតក្នុងបេសកកម្មដើម្បីបញ្ចៀសកម្ពុជាមិនឱ្យធ្លាក់ចូលទៅក្នុងបញ្ជីប្រផេះប្រឆាំងការសម្អាតប្រាក់ជាថ្មីទៀត។លោក ស៊ឹង សែនករុណា អ្នកនាំពាក្យអង្គការអាដហុកគាំទ្រនិងកោតសរសើរជាខ្លាំងពេលឃើញអាជ្ញាធរគ្រប់លំដាប់ថ្នាក់ធ្វើសកម្មភាពយ៉ាងសកម្មលើការលុបបំបាត់និងទប់ស្កាត់ការលាងលុយកខ្វក់ ទោះបីជាកម្ពុជាត្រូវបានដកចេញពីបញ្ជីប្រផេះដោយអង្គការ FATF ហើយក៏ដោយ។លោកបានជំរុញបន្ថែមថាភាគីពាក់ព័ន្ធទាំងអស់ក្នុងរឿងនេះគប្បីពង្រឹងការអនុវត្តបន្ថែមទៀត ជាពិសេសត្រួតពិនិត្យមើលរាល់លំហូរសាច់ប្រាក់ដែលគ្មានប្រភពច្បាស់លាស់ ព្រោះវាជាប្រភពដែលនាំដល់ការបង្កើតការលាងសម្អាតប្រាក់។លោកនិយាយថា៖ «ការពង្រឹងបែបនេះ ដើម្បីទប់ស្កាត់ការលាងលុងកខ្វក់ពីសំណាក់អ្នកមានអំណាចឬអ្នកមានឥទ្ធិពលក្នុងការលាងសម្អាតប្រាក់»។យោងតាមច្បាប់ស្ដីពីការប្រឆាំងការសម្អាតប្រាក់និងហិបរញ្ញប្បទានភេរវកម្ម បានឱ្យដឹងថាការសម្អាតប្រាក់ គឺការបំប្លែងឬការផ្ទេរប្រាក់ដោយមិនដឹងថាទ្រព្យសម្បត្តិនេះជាផលនៃបទល្មើសក្នុងគោលបំណងបិទបាំងឬក្លែងប្រភពដើមមិនស្របច្បាប់នៃទ្រព្យសម្បត្តិទាំងនេះឬបុគ្គលណាដែលបានពាក់ព័ន្ធនឹងបទល្មើសដើម្បីឱ្យបុគ្គលនោះគេចផុតពីផលវិបាកតាមផ្លូវច្បាប់នូវសកម្មភាពរបស់ខ្លួន៕Khmer Times
Post a Comment