សម្ដេចហ៊ុន សែនបញ្ជាក់ថាគណបក្សប្រជាជនគ្រប់គ្រងអំណាចប្រទេសមានសន្តិភាពស្ថិរភាពនិងមានការអភិវឌ្ឍ
សម្តេចហ៊ុន សែននាយករដ្ឋមន្ត្រីនៃកម្ពុជាបានគូសបញ្ជាក់ថាគណបក្សប្រជាជនគ្រប់គ្រងអំណាចគឺច្បាស់ណាស់ថាប្រទេសនេះមានសិទ្ធិ សេរីភាព មានសន្តិភាពស្ថិរភាពនិងមានការអភិវឌ្ឍ។ក្នុងពិធីសម្ពោធដាក់ឱ្យប្រើប្រាស់អគារមន្ទីរពេទ្យបង្អែកស្រុកក្រូចឆ្មារ ខេត្តត្បូងឃ្មុំ នាព្រឹកថ្ងៃទី០៣ ខែមេសា ឆ្នាំ២០២៣ សម្តេចហ៊ុន សែន បានថ្លែងថា៖«គណបក្សប្រជាជនគ្រប់គ្រងអំណាចវាច្បាស់ណាស់ថាប្រទេសនេះមានសិទ្ធិ សេរីភាព មានសន្តិភាពស្ថិរភាពនិងមានការអភិវឌ្ឍ។ សម្រាប់គណបក្សដទៃតើអ្នកទាំងអស់គ្នាច្បាស់ហើយឬនៅ ក្រែងលោរត់ជាន់គ្នាទៀត។ប៉ុន្តែក្នុងពេលដែលគណបក្សប្រជាជនគ្រប់គ្រងគឺអត់មានរត់ទៅណាទេ»។ សម្តេចលើកឡើងថាចំពោះប្រាក់ខែចេះតែកើនឡើងម្តងបន្តិចៗ។ប៉ុន្តែវាកើនឡើង។អ្នកខ្លះឮឥឡូវគេដេញថ្លៃអានេះពីរលានដល់ពីរលានប្រាំសែន ចេះតែដេញថ្លៃទៅតែគាត់ដេញថ្លៃទៅអត់លុយ តែយើងបើទោះបីបានតិចបានច្រើនក៏មាន។ឥឡូវលុយបើក១ខែពីរដង ហើយអត់ចាំបាច់អីទេគឺបើកតាមធនាគារទៀត។ជាមួយគ្នានេះដែរ សម្ដេចហ៊ុន សែនក៏បានថ្លែងអំណរគុណដល់ប្រជាពលរដ្ឋរស់នៅខេត្តត្បូងឃ្មុំនិយាយដោយឡែកនិងប្រជាពលរដ្ឋរស់នៅទូទាំងប្រទេសនិយាយជារួមដែលបានបោះឆ្នោតជូនគណបក្សប្រជាជនកម្ពុជា នាពេលកន្លងមក។ សម្ដេចនាយករដ្ឋមន្រ្ដីសង្ឃឹមថា នៅថ្ងៃទី២៣ ខែកក្កដា ឆ្នាំ ២០២៣ ខាងមុខនេះ ប្រជាពលរដ្ឋរស់នៅខេត្តត្បូងឃ្មុំ និងនៅទូទាំងប្រទេសនឹងបន្តបោះឆ្នោតជូនគណបក្សប្រជាជនកម្ពុជា បន្តទៀត៕AKP
Post a Comment