រដ្ឋមន្ត្រីក្រសួងការពារជាតិចំអកឲ្យបរទេសដែលចង់ធ្វើសមយុទ្ធជាមួយកម្ពុជាតែមិនផ្តល់សម្ភារផ្គត់ផ្គង់ដូចភាគីចិន
សម្តេចឧបនាយករដ្ឋមន្ត្រី ទៀ បាញ់រដ្ឋមន្ត្រីក្រសួងការពារជាតិបានចំអកដល់បណ្តាបរទេសដែលចង់ធ្វើសមយុទ្ធយោធាជាមួយកម្ពុជា តែមិនដែលបានផ្គត់ផ្គង់សម្ភារយោធាដូចភាគីចិនដែលធ្វើជាមួយកម្ពុជារាល់ដងមក។ ការចំអករបស់ប្រមុខការពារជាតិកម្ពុជាចំពោះបណ្តាបរទេសនានា ធ្វើឡើងនាពេលកម្ពុជានិងចិនទើបតែបញ្ចប់សមយុទ្ធនាគមាសឆ្នាំ២០២៣ នៅថ្ងៃពុធនេះ។ ប្រមុខការពារជាតិកម្ពុជាសម្តេចទៀ បាញ់ បានរិះគន់ចំពោះបណ្តាបរទេសដែលច្រណែននឹងសមយុទ្ធយោធារវាង កម្ពុជា-ចិនដែលតែងតែធ្វើជាញឹកញយនោះ ព្រោះកម្ពុជានៅខ្វះខាតសម្ភារ មធ្យោបាយនិងកិច្ចការមួយចំនួនដែលបម្រើឲ្យការងារសមយុទ្ធយោធា ដូចដែលកម្ពុជាបានធ្វើសមយុទ្ធនាគមាសឆ្នាំ២០២៣នេះ។សម្តេចទៀ បាញ់ បានបញ្ជាក់ថាកម្ពុជានៅខ្វះខាតស្ទើរតែទាំងស្រុងទៅលើការរៀបសមយុទ្ធយោធាជាមួយនឹងបរទេស។តាមប្រមុខការពារជាតិកម្ពុជា គឺ ចិនមានសមានចិត្តនិងសមត្ថភាពគ្រប់គ្រាន់ក្នុងការផ្តល់នូវសម្ភារ និងមធ្យោបាយទាំងឡាយទើបធ្វើឲ្យកម្ពុជាអាចរៀបចំសមយុទ្ធយោធាបាន ដូចអ្វីដែលបានកើតឡើងក្នុងពេលនេះ។ ក្នុងន័យនេះ សម្តេចទៀ បាញ់ បានចំអកដល់បរទេសដែលគេអាចដឹងថាជាសហរដ្ឋអាមេរិក ដ្បិតកម្ពុជា-អាមេរិកបានលុបចោលសមយុទ្ធឆ្មាំអង្គរតាំងពីឆ្នាំ២០១៧មក។សម្តេចឧបនាយករដ្ឋមន្ត្រី ទៀ បាញ់ បញ្ជាក់ថា បរទេសមួយចំនួនបានតែថាប៉ុណ្ណោះ តែមិនដែលបានមកពិភាក្សា និងទទួលខុសត្រូវលើការធ្វើលំហាត់សមយុទ្ធជាមួយកម្ពុជា ដូចភាគីចិនសោះឡើយ។ ដូចភាគីចិនដែលការធ្វើលំហាត់សមយុទ្ធយោធា តែងតែប្រគល់សម្ភារទាំងនោះជូនដល់កម្ពុជា។នេះបើតាមសម្តេចទៀ បាញ់ ដែលបានឆ្លើយទៅនឹងសំណួររបស់ក្រុមអ្នកសារព័ត៌មានក្រោយបិទបញ្ចប់សមយុទ្ធនាគមាសកម្ពុជា-ចិន នៅថ្ងៃទី០៥មេសានេះ។សម្រាប់សមយុទ្ធនាគមាសឆ្នាំ២០២៣ សម្តេចទៀ បាញ់ បានវាយតម្លៃថា ទទួលបានលទ្ធផលជាផ្លែផ្កាដោយបង្ហាញឲ្យឃើញពីមិត្តភាពដែកថែករវាងកម្ពុជា-ចិនក្នុងពេលបច្ចុប្បន្ន។ហើយសមយុទ្ធនេះក៏នឹងបង្ហាញប្រាប់ពិភពលោកថាមិត្តភាពកម្ពុជា-ចិនជាមិត្តភាពដែលមិនអាចបំបែកបានឡើយ។គួរបញ្ជាក់ថាកម្ពុជា-ចិនបានរៀបចំជាថ្មីនូវសមយុទ្ធយោធានាគមាសឆ្នាំ២០២៣ ពីថ្ងៃទី២០មីនាដល់ថ្ងៃទី០៥មេសាបន្ទាប់ពីភាគីរដ្ឋទាំង២បានផ្អាកអស់២ឆ្នាំដោយសារតែការរាតត្បាតជំងឺកូវីដ១៩។ ប្រធានបទក្នុងឆ្នាំនេះ គឺផ្តោតទៅលើ ប្រតិបត្តិការការពារសន្តិសុខ ក្នុងព្រឹត្តិការណ៍ធំៗ និងការជួយសង្គ្រោះមនុស្សធម៌នៃកងទ័ពទាំង២កម្ពុជា-ចិន។ ការរៀបចំសមយុទ្ធយោធាជាថ្មីនេះ ត្រូវបានសារព័ត៌មានលោកខាងលិច រិះគន់មិនសំចៃដៃ ថាបានបង្កើនការព្រួយបារម្ភចំពោះសហរដ្ឋអាមេរិក និងប្រទេសជិតខាងក្នុងតំបន់ ដ្បិតទំនាក់ទំនងកម្ពុជា-ចិន កាន់តែស៊ីជម្រៅបន្ថែមទៀត។ក៏ប៉ុន្តែភាគីចិន បានអះអាងវិញថា សមយុទ្ធនាពេលនេះធ្វើឡើងប្រកបដោយសន្តិភាពគឺមិនដូចសមយុទ្ធរួមគ្នាដែលដឹកនាំដោយសហរដ្ឋអាមេរិកនៅក្នុងតំបន់អាស៊ីប៉ាស៊ីហ្វិក ដែលសង្កត់ធ្ងន់លើការប្រឈមមុខដាក់គ្នានោះទេ។ ពោលគឺសមយុទ្ធរួមកម្ពុជាចិន គឺជាសមយុទ្ធដែលរៀបចំជាប្រចាំ ដោយផ្តោតលើការប្រឆាំងអំពើភេរវកម្ម ឧក្រិដ្ឋកម្មឆ្លងដែន ព្រមទាំងជំនួយផ្នែកវេជ្ជសាស្រ្ដ និងការជួយសង្គ្រោះ ដែលមិនមែនជាចំណុចរសើប៕RFI
សមយុទ្ធនាគមាសឆ្នាំ២០២៣។
/unnamed.png
Post a Comment