នាយករដ្ឋមន្ត្រីកម្ពុជា៖តាមដានស្ថានការណ៍នៅប្រទេសស៊ូដង់ឱ្យបានជាប់ដើម្បីជម្លៀសនិស្សិតខ្មែរឥស្លាមចំនួន០៦នាក់
សម្ដេចហ៊ុនសែននាយករដ្ឋមន្ត្រីនៃកម្ពុជាបានណែនាំឱ្យទេសរដ្ឋមន្រ្តី អូស្មាន់ហាស្សាន់តាមដានស្ថានការណ៍នៅប្រទេសស៊ូដង់ឱ្យបានជាប់ដើម្បីជម្លៀសនិស្សិតខ្មែរឥស្លាមចំនួន០៦នាក់ដែលកំពុងស្ថិតនៅរដ្ឋធានីខាទុំ នៃប្រទេសស៊ូដង់មកកាន់ប្រទេសវិញ ខណៈពេលប្រទេសម៉ាឡេស៊ី អាចនឹងជម្លៀសប្រជាជនរបស់ពួកគេចេញពីប្រទេសស៊ូដង់។
ការណែនាំរបស់សម្ដេចនាយករដ្ឋមន្រ្ដីបែបនេះ ក្នុងពិធីបុណ្យបញ្ចុះខណ្ឌសីមាព្រះវិហារ ពុទ្ធាភិសេក និងឆ្លងសមិទ្ធផលនា នាក្នុងវត្តព្រះបារមីវង្កតបុរី នាព្រឹកថ្ងៃទី២៤ ខែមេសា ឆ្នាំ២០២៣ ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។សម្ដេចហ៊ុន សែនបានមានប្រសាសន៍ថា សម្ដេចទើបតែទទួលបានព័ត៌មាពីប្រទេសស៊ូដង់កាលពីពេលថ្មីៗនេះថានៅរដ្ឋធានីខាទុំនៃប្រទេសស៊ូដង់មាននិស្សិតខ្មែរឥស្លាមចំនួន៦នាក់កំពុងស្ថិតនៅទីនោះ។ សម្ដេចបានថ្លែងថាលោក អូស្មាន ហាស្សាន់ទេសរដ្ឋមន្ត្រីទទួលបន្ទុកបេសកកម្មពិសេសតាមដានបញ្ហានេះឱ្យជាប់ ហើយនៅពេលប្រទេសម៉ាឡេស៊ីអាចនឹងជម្លៀសប្រជាជនរបស់ពួកគេចេញពីប្រទេសស៊ូដង់តាមយន្ដហោះក្ដីឬតាមនាវាក្ដីគឺស្នើសុំដឹកនិស្សិតខ្មែរឥស្លាមទាំង០៦នាក់នោះមកជាមួយផងដែរ។សម្ដេចគូសបញ្ជាក់ថា៖ «ខ្ញុំទើបទទួលបានព័ត៌មានថា ប្រទេសស៊ូដង់មានបងប្អូនខ្មែរ-ឥស្លាមរបស់យើងជានិស្សិតមានរហូតដល់០៦នាក់ដែលកំពុងស្ថិតនៅទីនោះ ហើយកំពុងឱ្យលោក អូស្មាន ហាស្សាន់ តាមដាមកិច្ចការងារនេះឱ្យជាប់នៅពេលប្រទេសម៉ាឡេស៊ី អាចនឹងជម្លៀសប្រជាជនតាមយន្ដហោះឬតាមនាវាគឺសុំអាចចេញដំណើរជាមួយគ្នាព្រោះការប្រយុទ្ធគ្នានៅប្រទេសនេះកំពុងតែខ្លាំង»។ជាមួយគ្នានេះ សម្ដេចនាយករដ្ឋមន្ដ្រីលើកឡើងថា សម្រាប់ប្រទេសកម្ពុជា គ្មានការប្រយុទ្ធណាមួយកើតឡើងនោះទេហើយកម្ពុជាអាចប្រារព្ធពិធីបុណ្យទាននិងបុណ្យចូលឆ្នាំថ្មីប្រពៃណីខ្មែរយ៉ាងសប្បាយរីករាយដោយសារតែប្រទេសមានសុខសន្តិភាពគ្មានភ្លើងសង្គ្រាម។ សម្ដេចបានអះអាងថា ក្នុងពេលដែលប្រទេសស៊ូដង់កំពុងមានសង្គ្រាមកម្ពុជាឯណោះវិញ គ្មានការប្រយុទ្ធណាមួយកើតឡើងនោះទេ ហើយកម្ពុជាទើបបិទបញ្ចប់ ពិធីបុណ្យចូលឆ្នាំថ្មីដែលមានប្រជាពលរដ្ឋដើរលេងកម្សាន្ដរហូតដល់ជាង១៣លាននាក់។សម្ដេចនាយករដ្ឋមន្រ្ដីបានសង្កត់ធ្ងន់ថា កម្ពុជាកំពុងតែមានសុខសន្ដិភាពពេញលេញដែលបង្កលក្ខណៈងាយស្រួលដល់ប្រជាពលរដ្ឋក្នុងការដើរលេងកម្សាន្ដនិងប្រារព្ធពិធីផ្សេងៗដោយមិនមានការភ័យខ្លាច។សូមជម្រាបជូនថា កាលពីពេលថ្មីៗនេះកងកម្លាំងប្រដាប់អាវុធស៊ូដង់(SAF)និងកងកម្លាំងគាំទ្ររហ័ស(RSF)បានប្រយុទ្ធគ្នាយ៉ាងស្វិតស្វាញនៅក្នុងរដ្ឋធានីខាទុំនិងតំបន់ផ្សេងទៀតរបស់ស៊ូដង់ដើម្បីគ្រប់គ្រងប្រទេសធំទី៣របស់អាហ្វ្រិកមួយនេះ។ យោងតាមក្រសួងសុខាភិបាលប្រទេសស៊ូដង់បានរាយការណ៍ដែរថាគិតត្រឹមសប្ដាហ៍មុនមនុស្សយ៉ាងហោចណាស់២៧០នាក់ ត្រូវបានសម្លាប់និង២ ៦០០នាក់បានរងរបួសខណៈអ្នកស្លាប់និងរបួសភាគច្រើនគឺជាជនស៊ីវិលដែលជាប់គាំងក្នុងការបាញ់ប្រហារនេះ៕AKP
Post a Comment