កម្ពុជានឹងប្រារព្ធព្រះរាជពិធីច្រត់ព្រះនង្គ័លនៅខេត្តកំពង់ធំបន្ទាប់ពីអាក់ខានអស់រយៈពេល៣ឆ្នាំ
នៅឆ្នាំ២០២៣នេះកម្ពុជានឹងរៀបចំប្រារព្ធព្រះរាជពិធីច្រត់ព្រះនង្គ័លក្នុងស្រុកកំពង់ស្វាយខេត្តកំពង់ធំនៅថ្ងៃទី៨ខែឧសភាបន្ទាប់ពីអាក់ខានអស់រយៈពេល៣ឆ្នាំដោយសារការរាតត្បាតនៃជំងឺកូវីដ-១៩។ព្រះរាជពិធីច្រត់ព្រះនង្គ័លនឹងមានការយាងចូលរួមក្រោមព្រះរាជាធិបតីដ៏ខ្ពង់ខ្ពស់របស់ព្រះមហាក្សត្រខ្មែរព្រះបរមនាថ នរោត្ដម សីហមុនី។ព្រះរាជពិធីច្រត់ព្រះនង្គ័លគឺជានិមិត្តរូបនៃការផ្ដើមប្រកាសរដូវកាលបង្កបង្កើនផលថ្មីរបស់ប្រជាកសិករខ្មែរនិងផ្សងប្រផ្នូលពីភោគផលកសិកម្មនៅឆ្នាំខាងមុខតាមការបរិភោគរបស់ «គោឧសភរាជ»។ព្រះរាជពីធីនេះជាព្រះរាជប្បវេណីដ៏សំខាន់មួយរបស់ពលរដ្ឋកម្ពុជាដែលព្រះមហាក្សត្រគ្រប់ព្រះអង្គតែងដឹកនាំធ្វើតាំងពីបុរាណកាលមក ហើយវាត្រូវបានប្រារព្ធធ្វើឡើងនៅក្នុងខែពិសាខជារៀងរាល់ឆ្នាំ។លោកងួន រតនៈ អភិបាលខេត្តកំពង់ធំ កាលពីថ្ងៃព្រហស្បត្តិ៍ បាននិយាយថាលោកបានចុះពិនិត្យទីតាំងដើម្បីរៀបចំសណ្តាប់ធ្នាប់សម្រាប់ត្រៀមប្រារព្ធពិធីច្រត់ព្រះនង្គ័លដែលប្រព្រឹត្តទៅនៅថ្ងៃទី៨ ខែឧសភា ឆ្នាំ២០២៣ខាងមុខនេះ។ក្នុងដំណើរការចុះត្រួតពិនិត្យនោះ លោកបានជំរុញអាជ្ញាធរមូលដ្ឋានបន្តយកចិត្តទុកដាក់មើលថែទាំសួនស្មៅរៀបចំបរិវេណធំទូលាយងាយស្រួលប្រារព្ធព្រះរាជពិធីនិងត្រៀមទីតាំងសម្រាប់ចំណតរថយន្ត។លោកអភិបាលខេត្តបាននិយាយថា៖«ពេលនេះគោឧសភរាជចំនួន៥នឹមត្រូវបានយកមកដល់ទីតាំងដើម្បីត្រៀមប្រារព្ធពិធីជាមួយនឹងអ្នកមើលថែទាំសម្រាប់ការផ្ដល់ស្មៅនិងទឹកប្រកបដោយភាពត្រឹមត្រូវនិងសុវត្ថិភាព»។ក្នុងព្រះរាជពិធីច្រត់ព្រះនង្គ័លនេះនឹងមានការតាំងបង្ហាញពីសមិទ្ធផលនានារបស់ក្រសួងស្ថាប័ននានាផងដែរ។ខ្មែរថាមស៍មិនអាចទាក់ទងលោក ឈិន កេតនា អនុប្រធានអចិន្ត្រៃយ៍នៃគណៈកម្មាធិការជាតិរៀបចំបុណ្យជាតិនិងអន្តរជាតិដើម្បីបញ្ជាក់លើរឿងនេះបានទេពីម្សិលមិញ។លោក យូ សុភា សាស្ត្រាចារ្យវប្បធម៌ខ្មែរនៃសាកលវិទ្យាល័យភូមិន្ទភ្នំពេញ បានលើកឡើងថាក្នុងព្រះរាជពិធីនេះ គឺព្រាហ្មណ៍ព្រះរាជគ្រូនឹងសូត្រផ្សងគោឧសភរាជ ដែលទឹមច្រត់ព្រះនង្គ័លនោះឱ្យបរិភោគចំណី៧មុខ ដែលបានដាក់តម្រៀបគ្នាជាជួរចានពាន រួមមានគ្រាប់ស្រូវមួយមុខ គ្រាប់សណ្ដែកមួយមុខ គ្រាប់ពោតមួយមុខ គ្រាប់ល្ងមួយមុខ ស្មៅស្រស់មួយមុខ ទឹកមួយមុខនិងស្រាមួយមុខ។លោកបន្តថាលុះពេលសូត្រចប់ ព្រាហ្មណ៍ព្រះរាជគ្រូយកទឹកមន្ដប្រោះក្បាលគោឧសភរាជ ហើយមន្ត្រីដឹកគោនោះទៅជិត ចំណីទាំង៧យ៉ាងនោះ។ បន្ទាប់មកគេដាក់គោឧសភរាជឱ្យបរិភោគចំណីទាំងនោះដោយមិនបង្ខំ។ កាលណាគោឧសភរាជបរិភោគចំណីមួយឬពីរយ៉ាងព្រាហ្មណ៍ក៏ទាយផលប្រផ្នូលតាមនោះ។លោកថា៖ »បើគោឧសភរាជបានបរិភោគពោតនិងសណ្ដែកច្រើនជាងគេ ព្រាហ្មណ៍ព្រះរាជគ្រូទំនាយទាយថា ទិន្នផលកសិកម្មក្នុងឆ្នាំនោះនឹងទទួលបានទិន្នផលតិចតួចបំផុត គឺលើកលែងតែពោតនិងសណ្ដែកប៉ុណ្ណោះដែលទទួលបានទិន្នផលច្រើន»។លោកបន្ថែមទៀតថា៖ «បើបរិភោគស្មៅឬស្រាដំបូងគេនោះទំនាយថានឹងមានជំងឺតម្កាត់ពីសត្វពាហនៈ។ បើផឹកស្រានឹងកើតមានមនុស្សពាល ចោរលួច ចោរប្លន់ និងគ្រោះទុរ្ភិក្សផ្សេងៗជាដើម»។ការទស្សន៍ទាយនេះពិតឬមិនពិត គឺមិនមែនជាបញ្ហាធំទេ។អ្វីដែលសំខាន់វាជាទំនៀមទម្លាប់និងជាអត្តសញ្ញាណរបស់កម្ពុជាដែលមានអាយុកាលដ៏យូរអង្វែងមួយនេះ ហើយការទស្សន៍ទាយនេះ ក៏បានពញ្ញាក់ស្មារតីពលរដ្ឋខ្មែរទាំងអស់មានការធ្វើកសិកម្មដោយប្រុងប្រយ័ត្ន។បើតាមលោក យូ សុភា ព្រះរាជពិធីនេះ គឺជានិមិត្តរូបដែលព្រះរាជាបានយកព្រះទ័យទុកដាក់ចំពោះប្រជារាស្រ្ត។ ព្រះមហាក្សត្រធ្វើពិធីច្រត់ព្រះនង្គ័ល ដើម្បីបួងសួងសុំទឹកភ្លៀង សុំសុខសន្តិភាព សុំកុំឱ្យមានរោគាព្យាធិ ចង់ឱ្យមានសុខសន្តិភាព និងឱ្យរាស្ត្រទូទាំងប្រទេសបានផលកសិកម្មល្អគ្រប់គ្នា។តាំងពីដើមរៀងមក ព្រះរាជពិធីច្រត់ព្រះនង្គ័លតែងប្រារព្ធឡើងនៅវាលមេន (ទីព្រះស្រែព្រះមេរុ)ជាប់ព្រះបរមរាជវាំងជារៀងរាល់ឆ្នាំ។ដោយឡែកប៉ុន្មានឆ្នាំក្រោយមក ព្រះរាជពិធីនេះបានបង្វែរទៅប្រារព្ធធ្វើនៅតាមបណ្ដាខេត្តវិញ ហើយតាកែវ ជាខេត្តចុងក្រោយដែលបានប្រារព្ធព្រះរាជពិធីនេះកាលពីឆ្នាំ២០១៩ មុននឹងអាក់ខានដោយសារការរាតត្បាតនៃជំងឺកូវីដ-១៩៕KhmerTimes
ព្រះរាជពិធីច្រត់ព្រះនង្គ័ល ក្នុងឆ្នាំ២០១៨ នៅខេត្តស្វាយរៀង។រូបអ៊ីនធឺណិត
/unnamed.png
Post a Comment