ទីបំផុតឧកញ៉ាជាសារ៉ននិងបក្ខពួកត្រូវបានឃាត់ខ្លួនពាក់ព័ន្ធការរកស៊ីវិនិយោគដីឡូតិ៍
ទីបំផុតឧកញ៉ាជា សារ៉ននិងមនុស្សជិត១០នាក់ទៀតត្រូវបានកងកម្លាំងសមត្ថកិច្ចខេត្តកំពត ធ្វើការឃាត់ខ្លួន ពាក់ព័ន្ធករណី ឆរបោក ប្រជាពលរដ្ឋ ក្រោមរូបភាពវិនិយោគដីឡូតិ៍ នៅស្រុកឈូកខេត្តកំពត។ ការឃាត់ខ្លួនឧកញ៉ា វិយោគដីឡូតិ៍នេះ ធ្វើឡើង ខណៈដែល លោក ម៉ៅ ធនិន អភិបាលខេត្តកំពត បានបើកវេទិកាសាធារណៈជាមួយពលរដ្ឋរាប់ពាន់គ្រួសារដែលអះអាងថាចាញ់បោកក្រុមហ៊ុនអស់ប្រាក់សរុបជិត៤០លានដុល្លារ។ការឃាត់ខ្លួនឧកញ៉ា រកស៊ីដីឡូតិ៍ ជា សារ៉ន និងមនុស្សជិត១០នាក់ទៀតនោះ គឺដោយសារតែមានពលរដ្ឋយ៉ាងហោចណាស់ ២,៤៦១ គ្រួសារ មានសរុបទឹកប្រាក់ជិត៤0លានដុល្លាទាំងនៅខេត្តកំពត និងខេត្តផ្សេងៗទៀត ត្រូវចាញ់ការបោកបញ្ឆោត របស់ក្រុមវិនិយោគដីឡូតិ៍ ជា សារ៉ន រៀលធី។ នេះជាការគូសបញ្ជាក់តាមហ្វេសប៊ុករបស់ស្នងការនគរបាលខេត្តកំពត។ពលរដ្ឋដែលចាញ់បោកក្រុមហ៊ុនដីឡូតិ៍នេះ បានរៀបរាប់ទាំងទឹកភ្នែកប្រាប់លោក ម៉ៅ ធនិនអភិបាលខេត្តកំពតនៅថ្ងៃទី២២មេសាថា ពួកគេម្នាក់ៗត្រូវបានក្រុមបណ្តាញរបស់លោក ជា សារ៉ន បញ្ចុះបញ្ចូលឲ្យខ្ចីលុយពីស្ថាប័នមីក្រូហិរញ្ញវត្ថុម្នាក់រាប់ម៉ឺនដុល្លារដើម្បីទិញដីឡូតិ៍របស់លោក ជា សារ៉ន ដោយកម្មវត្ថុនៃការខ្ចីទៅទិញគ្រឿងចក្រកសិកម្មឬដីស្រែទៅវិញ។ប៉ុន្តែពេលដែលលុយកម្ចីធ្លាក់មក ភ្នាក់ងារលោក ជា សារ៉ន បាននាំទៅផ្តិតមេដៃដើម្បីទិញដីឡូតិ៍ទៅវិញ ខណៈដែលពលរដ្ឋទាំងនោះ មិនមានប្រាក់ចំណូលប្រចាំខែ។តាមការសួរដេញដោលរបស់លោក ម៉ៅ ធនិន អភិបាលខេត្តកំពត ចំពោះមុខមនុស្សប្រមាណ៣០០០នាក់នៅវត្តអង្គឈូក ក្នុងស្រុកឈូក ពលរដ្ឋ ដោយមានទាំងតំណាងក្រុមហ៊ុនជា សារ៉ន រៀលធី ចូលរួមផងនោះ ពលរដ្ឋបានទទួចឲ្យលោក ម៉ៅ ធនិន ជួយអន្តរាគមន៍ករណីនេះ ដោយសារតែពួកគេជាប់បំណុលប្រឈមនឹងការរឹបអូសផ្ទះ និងដីធ្លី ពីព្រោះតែគ្មានលុយសងទៅម្ចាស់បំណុលវិញ។ លោក ម៉ៅ ធនិន បានចាត់បញ្ហានេះជាបង្កឡើងដោយក្រុមអ្នកមានលុយខ្ចីឃុបឃិតជាមួយក្រុមហ៊ុនដីឡូតិ៍ ជា សារ៉ន។នៅមុនពេលឃាត់ខ្លួន លោក ជា សារ៉ន ដែលមានងារជាឧកញ៉ា បានឡើងឆ្លើយតបនៅចំពោះមុខពលរដ្ឋរាប់ពាន់គ្រួសារ និងអភិបាលខេត្តថា ខ្លួនទទួលកំហុសគ្រប់យ៉ាងជំនួសបុគ្គលិករបស់គាត់។ តែលោកនៅតែអះអាងថា ក្រុមហ៊ុនរបស់ខ្លួនល្អតាំងដើមមក ទើបពលរដ្ឋមានការជឿជាក់នាំគ្នាវិនិយោគរាប់សិបលានដុល្លារតាំងពីអំឡុងកូវីដ១៩។ ប៉ុន្តែលោក អះអាងថា នៅខែកុម្ភៈ២០២៣ ក្រុមហ៊ុននេះបានបោះទុនសង់អាគារនៅភ្នំពេញអស់លុយ២០លានដុល្លារ ទើបអស់លុយបម្រុង ពីព្រោះតែលក់អាគារខុនដូរលែងដាច់៕RFI
រូបភាព៖nokorwatnews
/unnamed.png
Post a Comment