ផ្ទុះ​អាវុ​ធ​​ជិត​​នា​យករដ្ឋមន្ត្រី​ជប៉ុន​(AFP,​Re​ut​ers)

វត្ថុ​មួយ​ត្រូវ​បាន​គប់​ទៅ​លើ​វេទិកា​ដែល​នាយក​រដ្ឋមន្ត្រី​ជប៉ុនFumio Kishida គ្រោងនឹងថ្លែង​នៅ​ក្នុង​ទីក្រុងWakayamaបង្ក​ឱ្យ​មាន​ការ​ផ្ទុះនិង​ផ្សែង​ដែល​ជំរុញ​ឱ្យ​លោក​ជម្លៀស​ចេញ។ការផ្ទុះនិងផ្សែងបានលេចឡើងនៅម៉ោងប្រហែល១១:៣០ព្រឹក (ម៉ោង៩:៣០នាទីព្រឹកម៉ោងនៅទីក្រុងភ្នំពេញ)បន្ទាប់ពីវត្ថុដែលមានរាងដូចបំពង់ត្រូវបានគេបោះចោលនៅជិតកន្លែងដែលនាយករដ្ឋមន្ត្រីជប៉ុនFumio Kishidaគ្រោងនឹងថ្លែងនៅឯកំពង់ផែនេសាទSaikazaki ទីក្រុង Wakayama ខេត្ត Wakayama ថ្ងៃនេះ។ Jiji រាយការណ៍។លោក Kishida ទើប​តែ​បញ្ចប់​ការ​ចុះ​ពិនិត្យ​ត្រី​នៅ​កំពង់​ផែ។ យោងតាមកម្មវិធីនាយករដ្ឋមន្ត្រីជប៉ុននឹងនិយាយនៅម៉ោង១១:៤០ព្រឹក ដើម្បីបង្ហាញពីការគាំទ្របេក្ខជនម្នាក់របស់គណបក្សLDPដែលកាន់អំណាចនៅក្នុងការបោះឆ្នោតសភាជាន់ទាបនាពេលខាងមុខ។ប្រព័ន្ធផ្សព្វផ្សាយជប៉ុនបាននិយាយថា វត្ថុនោះជាគ្រាប់បែកផ្សែង។ លោក Kishida ត្រូវ​បាន​គេ​ជម្លៀស​ភ្លាមៗ​ទៅ​កាន់​ប៉ុស្តិ៍​ប៉ូលិស​ក្នុង​តំបន់ដែលមាន​សុវត្ថិភាព។រូបថត​នៅ​កន្លែង​កើត​ហេតុ​បង្ហាញ​ពី​កម្លាំង​សន្តិសុខ​ឃាត់​ខ្លួន​បុរស​ម្នាក់។ នាយកដ្ឋាន​ពន្លត់​អគ្គីភ័យ​ក្នុង​តំបន់​បាន​និយាយ​ថា​មិន​មាន​អ្នក​រង​របួស​ក្នុង​ហេតុការណ៍​នេះ​ទេ។ស្ត្រី​ម្នាក់​ដែល​ធ្វើ​ដំណើរ​ជាមួយ​កូន​ស្រី​និយាយ​ថាគាត់​បាន​ឃើញ​វត្ថុ​មួយ​ហោះ​ពីលើ​ក្បាល​នាង។ នាង​បាន​និយាយ​ថា​៖«​វា​ធ្វើ​ឱ្យ​ខ្ញុំ​មាន​អារម្មណ៍​ថា​មិន​មាន​សុវត្ថិភាព។ដូច្នេះ​យើង​ក៏​ប្រញាប់​ចេញ​ទៅ​ក្រៅ​។​ បន្ទាប់​មក​មាន​សំឡេង​ផ្ទុះ​ខ្លាំង​ធ្វើ​ឱ្យ​កូនស្រី​ខ្ញុំ​យំ​។សាក្សីម្នាក់ទៀតបាននិយាយថាហ្វូងមនុស្សភ័យស្លន់ស្លោនិងបែកខ្ញែកភ្លាមៗមុនពេលការផ្ទុះបានកើតឡើងដោយសារតែមាននរណាម្នាក់និយាយថាគ្រឿងផ្ទុះមួយត្រូវបានគប់។លោក Hiroshi Moriyama ប្រធានយុទ្ធសាស្ត្របោះឆ្នោតរបស់LDPបាននិយាយថា"សម្រាប់រឿងបែបនេះកើតឡើងនៅពាក់កណ្តាលនៃយុទ្ធនាការបោះឆ្នោតដែលជាមូលដ្ឋានគ្រឹះនៃលទ្ធិប្រជាធិបតេយ្យគឺជាការសោកស្តាយ។វាគឺជាអំពើឃោរឃៅដែលមិនអាចអត់ឱនបាន"។ឧបទ្ទវហេតុនេះកើតឡើងចំពេលដែលសន្តិសុខសម្រាប់អ្នកនយោបាយជប៉ុនបន្ទាប់ពីការធ្វើឃាតអតីតនាយករដ្ឋមន្ត្រី Shinzo Abe ក្នុងខែកក្កដាឆ្នាំ២០២២។ លោក Abe ត្រូវ​បាន​ជន​សង្ស័យ Tetsuya Yamagami បាញ់​២គ្រាប់​ដោយ​កាំភ្លើង​ច្នៃ ខណៈ​កំពុង​ថ្លែង​សុន្ទរកថា​នៅ​មុខ​ស្ថានីយ​ខេត្ត Nara ហើយ​បាន​ស្លាប់​នៅ​មន្ទីរ​ពេទ្យ​។រូបថត និងវីដេអូនៃកន្លែងកើតហេតុនៅពេលនោះបានបង្ហាញឱ្យឃើញជនសង្ស័យ Yamagami ចូលទៅជិតលោក Abe ពីខាងក្រោយ ដើម្បីបើកការបាញ់ប្រហារ ខណៈដែលអង្គរក្សផ្តោតលើផ្នែកខាងមុខ។អ្នកជំនាញនិយាយថាសំណាញ់សុវត្ថិភាពដែលការពារលោកAbeគឺរលុងពេក ដែលអនុញ្ញាតឱ្យជនសង្ស័យអាចចូលបាន។ បន្ទាប់​មក លោក Kishida បាន​រិះគន់​កំហុស​របស់​ប៉ូលីស​ក្នុង​ការ​ធានា​សន្តិសុខ​សម្រាប់​លោក Abe។ ប៉ូលីសក្នុងតំបន់ក៏បានសារភាពថាបានធ្វើកំហុស៕

កងកម្លាំងសន្តិសុខចាប់ជនសង្ស័យដែលបានគប់វត្ថុផ្ទុះនៅជិតកន្លែងដែលនាយករដ្ឋមន្ត្រីជប៉ុនFumio Kishidaគ្រោងនឹងថ្លែងសុន្ទរកថានៅទីក្រុង Wakayama ខេត្ត Wakayama កាលពីថ្ងៃទី១៥ខែមេសា។ រូបថត៖ Reuters

នាយក​រដ្ឋមន្ត្រី​ជប៉ុន​លោក Fumio Kishida ថ្លែង​ក្នុង​ទីក្រុង​តូក្យូ​នៅ​ថ្ងៃ​ទី ១៤ ខែ​មេសា។ រូបថត៖AFP