អាមេរិក​​យ​​ល់ព្រម​​​លក់​មី​​ស៊ី​លTo​​m​ahawkចំនួន​២​​២០​គ្រា​ប់​ឱ្យ​អូស្ត្រា​លី​(Reuters,C​NN)​

ក្រសួងការបរទេសសហរដ្ឋអាមេរិកបានអនុម័តការលក់មីស៊ីលឆ្លងទ្វីប Tomahawkចំនួន២២០គ្រាប់ទៅឱ្យប្រទេសអូស្ត្រាលីក្រោមកិច្ចព្រមព្រៀងដែលមានតម្លៃ៨៩៥លានដុល្លារ។ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណបាននិយាយនៅក្នុងសេចក្តីថ្លែងការណ៍មួយកាលពីថ្ងៃទី១៦ខែមីនាថាក្រសួងការបរទេសបានយល់ព្រមលើសំណើរបស់អូស្ត្រាលីក្នុងការទិញមីស៊ីលដើម្បីបំពាក់នាវាកងទ័ពជើងទឹក ដើរដោយថាមពលនុយក្លេអ៊ែរដែលទីក្រុងCanberraនឹងទទួលបានពីសហរដ្ឋអាមេរិក។ កិច្ចព្រមព្រៀងនេះមានតម្លៃ១.៣ពាន់លានដុល្លារអូស្ត្រាលី (៨៩៥លានដុល្លារ) រួមទាំងការថែទាំនិងជំនួយផ្នែកដឹកជញ្ជូន។

ទីភ្នាក់ងារនេះបាននិយាយនៅក្នុងសេចក្តីថ្លែងការណ៍មួយថា "ការទិញយកដែលបានស្នើឡើងនឹងធ្វើឱ្យប្រសើរឡើងនូវសមត្ថភាពរបស់អូស្ត្រាលីក្នុងការធ្វើអន្តរកម្មជាមួយកងកម្លាំងដែនសមុទ្ររបស់សហរដ្ឋអាមេរិកនិងសម្ព័ន្ធមិត្តផ្សេងទៀតក៏ដូចជាសមត្ថភាពរបស់ខ្លួនក្នុងការរួមចំណែកដល់បេសកកម្មដែលមានផលប្រយោជន៍ទៅវិញទៅមក" ។យោងតាមមន្ទីរបញ្ចកោណសាជីវកម្មការពារជាតិRaytheonគឺជាអ្នកម៉ៅការសំខាន់ដែលផ្គត់ផ្គង់អាវុធនៅក្នុងកិច្ចព្រមព្រៀងនេះ។ កិច្ចព្រមព្រៀងនេះត្រូវបានជូនដំណឹងទៅសភាអាមេរិកដើម្បីពិនិត្យ។ ប្រសិនបើគ្មានការជំទាស់ពីសភាទេកិច្ចសន្យានឹងត្រូវដាក់ជូនប្រធានាធិបតី JoeBidenដើម្បីអនុម័ត។ការលក់មីស៊ីលនេះគឺជាផ្នែកមួយនៃកិច្ចព្រមព្រៀង AUKUS រវាងសហរដ្ឋអាមេរិក អូស្ត្រាលីនិងចក្រភពអង់គ្លេស។ នេះគឺជាកិច្ចព្រមព្រៀងត្រីភាគីដើម្បីចែករំលែកបច្ចេកវិទ្យា និងធនធានដើម្បីបង្កើតកងនាវាមុជទឹកថ្មីដែលដើរដោយថាមពលនុយក្លេអ៊ែរក្នុងរយៈពេល២ទសវត្សរ៍ខាងមុខ។សហរដ្ឋអាមេរិកនឹងលក់នាវាមុជទឹកVirginia យ៉ាងហោចណាស់៣គ្រឿងទៅឱ្យអូស្ត្រាលី។ លើសពីនេះ អូស្ត្រាលីនិងអង់គ្លេសនឹងសាងសង់កងនាវាមុជទឹកដើរដោយថាមពលនុយក្លេអ៊ែរផ្ទាល់ខ្លួន។ត្រូវបានដាក់ពង្រាយជាលើកដំបូងក្នុងអំឡុងសង្គ្រាមឈូងសមុទ្រក្នុងឆ្នាំ១៩៩១មីស៊ីលTomahawk ហោះក្នុងរយៈកម្ពស់ទាបបំផុតក្នុងល្បឿន subsonic (ក្រោម១,២០០ គីឡូម៉ែត្រក្នុងមួយម៉ោង)ហើយត្រូវបានគ្រប់គ្រងដោយប្រព័ន្ធណែនាំមួយចំនួនអាស្រ័យលើបេសកកម្ម។ យោងតាមកងទ័ពជើងទឹកសហរដ្ឋអាមេរិក ពួកវាអាចត្រូវបានបាញ់ចេញពីនាវាមុជទឹកដែលផលិតដោយសហរដ្ឋអាមេរិកនិងអង់គ្លេស ក៏ដូចជាពីនាវាកងទ័ពជើងទឹកសហរដ្ឋអាមេរិកផងដែរ។

បច្ចុប្បន្នមានតែចក្រភពអង់គ្លេសប៉ុណ្ណោះដែលទិញ Tomahawks ពីអាមេរិក។ប៉ុន្តែថ្មីៗនេះជប៉ុនបានប្រកាសពីចេតនារបស់ខ្លួនក្នុងការទិញមីស៊ីលCruise រាប់រយគ្រាប់ដែលមានរយៈចម្ងាយឆ្ងាយជាង១,០០០ គីឡូម៉ែត្រ ដើម្បីពង្រឹងការការពាររបស់ពួកគេ។

រដ្ឋមន្ត្រីការពារជាតិអូស្ត្រាលី លោក Pat Conroy បាននិយាយថា មីស៊ីលTomahawkអាចត្រូវបានប្រើប្រាស់ដោយកងកម្លាំងការពារអូស្ត្រាលី (ADF) មុនពេលនាវាមុជទឹកថ្នាក់ដំបូងក្នុងចំណោមនាវាមុជទឹកប្រភេទ Virginiaផលិតដោយសហរដ្ឋអាមេរិកចំនួន៣គ្រឿងត្រូវបានចែកចាយនៅឆ្នាំ២០៣៣។នៅពេលដែលកិច្ចព្រមព្រៀងAUKUSត្រូវបានប្រកាសជាលើកដំបូងក្នុងឆ្នាំ ២០២១រដ្ឋាភិបាលអូស្ត្រាលីបាននិយាយថា ខ្លួនចង់ទិញមីស៊ីល Tomahawk ដើម្បីបំពាក់ដល់នាវាពិឃាត Hobart ។

លោកConroyបាននិយាយថា"នេះគឺជាផ្នែកនៃរបៀបវារៈរបស់រដ្ឋាភិបាលក្នុងការផ្តល់ឱ្យ ADF នូវសមត្ថភាពល្អបំផុតដែលអាចធ្វើទៅបាន ដោយអនុញ្ញាតឱ្យវាចាប់ផ្តើមការវាយប្រហាររយៈចម្ងាយឆ្ងាយ និងរារាំងសត្រូវដែលមានសក្តានុពលណាមួយ" ។

កិច្ចព្រមព្រៀងAUKUSត្រូវបានគេរំពឹងថានឹងចំណាយរហូតដល់២៤៥ពាន់លានដុល្លារក្នុងរយៈពេល៣០ឆ្នាំហើយត្រូវបានគាំទ្រដោយគណបក្សនយោបាយ២នៅក្នុងប្រទេសអូស្ត្រាលី។ប៉ុន្តែត្រូវបានរិះគន់យ៉ាងចាស់ដៃដោយអតីតនាយករដ្ឋមន្ត្រីការងារលោក Paul Keating ។ លោក Keating ដែលបានដឹកនាំប្រទេសពីឆ្នាំ១៩៩១ដល់ឆ្នាំ១៩៩៦បានហៅថា "ការសម្រេចចិត្តដ៏អាក្រក់បំផុតរបស់រដ្ឋាភិបាលការងារអូស្ត្រាលី" ក្នុងរយៈពេលជាង១០០ឆ្នាំ៕

មីស៊ីលTomahawkបាញ់បង្ហោះលើនាវាចម្បាំងអាមេរិកកំឡុងពេលសាកល្បងឆ្នាំ២០១៨។ រូបថត៖ កងទ័ពជើងទឹកអាមេរិក។