លោកហ៊ុន ម៉ាណែតឡើងជានាយឧត្តមសេនីយ៍
ព្រះមហាក្សត្រនរោត្តម សីហមុនីកាលពីថ្ងៃសុក្របានត្រាស់បង្គាប់ដំឡើងឋានន្តរស័ក្តិ លោក ហ៊ុន ម៉ាណែតពីឧត្តមសេនីយ៍ឯកផ្កាយ៣ទៅជានាយឧត្តមសេនីយ៍ផ្កាយមាស៤នៃកងយោធពលខេមរភូមិន្ទ ដើម្បីបន្តដឹកនាំអង្គភាពឱ្យកាន់តែមានប្រសិទ្ធភាព។ការត្រាស់បង្គាប់ដំឡើងឋានន្តរស័ក្តិជានាយឧត្តមសេនីយ៍ ខាងលើនេះ ធ្វើឡើងបន្ទាប់ពីលោក ហ៊ុន ម៉ាណែត កាលពីឆ្នាំ២០២១ និងឆ្នាំ២០២២ ត្រូវបានសមាជរបស់គណបក្សប្រជាជនកម្ពុជា បោះឆ្នោតផ្ដល់សេចក្ដីទុកចិត្តគាំទ្រជាបេក្ខភាពនាយករដ្ឋមន្ត្រីសម្រាប់ថ្ងៃអនាគតជំនួសសម្តេចនាយករដ្ឋមន្ត្រី ហ៊ុន សែន ដែលត្រូវជាឪពុកបង្កើត។នៅមុនព្រះមហាក្សត្រ ត្រាស់បង្គាប់ដំឡើងឋានន្តរស័ក្តិជានាយឧត្តមសេនីយ៍ លោក ហ៊ុន ម៉ាណែត មានឋានន្តរស័ក្ដិជា ឧត្តមសេនីយ៍ឯក និងមានតួនាទីជា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។ក្នុងពិធីសម្ពោធវិហារឥស្លាម និងសមិទ្ធផលនានា នៅស្រុកកោះអណ្តែត ខេត្តតាកែវ កាលពីថ្ងៃសៅរ៍ លោក ហ៊ុន ម៉ាណែត បានថ្លែងថ្វាយនូវអំណរព្រះរាជគុណចំពោះព្រះករុណាព្រះបាទ សម្តេចព្រះបរមនាថ នរោត្តម សីហមុនី ដែលទ្រង់សព្វព្រះហឫទ័យដំទ្បើងឋានរន្តស័កិ្តដល់លោកពី ឧត្តមសេនីយ៍ឯក ទៅជានាយឧត្តមសេនីយ៍ នៃកងយោធពលខេមរភូមិន្ទ។នាយឧត្តមសេនីយ៍ ហ៊ុន ម៉ាណែត ក៏បានអរគុណដល់រដ្ឋាភិបាល ក្រសួងការពារជាតិ និងអគ្គបញ្ជាការដ្ឋាន ដែលបានផ្តល់នូវទំនុកចិត្ត និងឱកាសដល់លោក ដើម្បីបន្តចូលរួមដឹកនាំនិងពង្រឹងកងយោធពលខេមរភូមិន្ទតទៅមុខទៀតក្រោមបុព្វហេតុបម្រើជាតិ សាសនា ព្រះមហាក្សត្រ។អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា រាល់ការដំឡើងឋានន្តរស័ក្តិដល់នាយទាហាន នាយប៉ូលីស ក៏ដូចមន្ត្រីរាជការ ដែលធ្វើឡើងតាមព្រះរាជក្រឹត្យ គឺមានសំណើស្នើសុំទូលថ្វាយពីលោកនាយករដ្ឋមន្ត្រី ហ៊ុន សែន ដោយផ្អែកលើគុណសម្បត្តិ និងសំណូមពរចាំបាច់របស់ប្រទេសជាតិ។លោកបន្ថែមថា មន្ត្រីនាយទាហាន នាយប៉ូលីល និងមន្ត្រីពាក់ព័ន្ធទាំងអស់ បើគ្មានគុណសម្បិត្តិទេ សម្តេចនាយករដ្ឋមន្ត្រី ក៏មិនទូលថ្វាយព្រះមហាក្សត្រ ដើម្បីព្រះរាជទាននូវព្រះរាជក្រឹត្យតែងតាំងឬដំឡើងឋានន្តរស័ក្ដិនោះទេ។លោក សុខ ឥសាន បន្តថា ចំពោះលោក ហ៊ុន ម៉ាណែត មានសមត្ថភាព និងសាកសមទទួលបានឋានន្តរស័ក្តិជានាយឧត្តមសេនីយ៍ ទើបសម្តេចនាយករដ្ឋមន្ត្រីទូលថ្វាយអង្គព្រះមហាក្សត្រ ដើម្បីប្រោសរាជទាននូវព្រះរាជក្រឹត្យដំឡើងតួនាទីបែបហ្នឹង។លោកបានបញ្ជាក់ថា មូលហេតុដែលអ្នកផ្សេងជាច្រើនទៀតមិនទទួលបានការស្នើសុំគឺទី១ រដ្ឋាភិបាលប្រើសន្ទានុសិទ្ធិដើម្បីវាយតម្លៃលើគុណសម្បត្តិរបស់មន្ត្រីយោធា មន្ត្រីនគរបាល ក៏ដូចមន្ត្រីរាជការស៊ីវិល និងទី២ រដ្ឋាភិបាលប្រើតួនាទីរបស់ខ្លួនស្នើអង្គព្រះមហាក្សត្រ ដើម្បីលើកទឹកចិត្តដល់មន្ត្រីដែលមានស្នាដៃ និងគុណសម្បត្តិពិសេសខុសប្លែកពីគេ។អ្នកនាំពាក្យគណបក្សប្រជាជនកម្ពុជាបន្ថែមថា៖ «កន្លងទៅខ្ញុំមានការចាប់អារម្មណ៍របស់វិទ្យុបរទេសដែលប្រឆាំងរដ្ឋាភិបាលបានលើកឡើងបញ្ហានេះតាំងពីរបីបួនថ្ងៃមកហើយ តាំងពីក្រោយចេញព្រះរាជក្រឹត្យមក ម៉្លេះគេមិនលើកសរសើរនោះទេ។ផ្ទុយទៅវិញក្នុងចរិតជាអ្នកប្រឆាំង [,,,] គេវាយប្រហារផ្សេងៗមកលើប្រមុខរាជរដ្ឋាភិបាល ហើយគេបានប្រែក្លាយការងាររដ្ឋឱ្យទៅជាការងារឯកជននៃក្រុមគ្រួសារត្រកូលហ៊ុនទៅវិញ»។កាសែតខ្មែរថាមស៍ ពុំអាចសុំការបញ្ជាក់ពីអ្នកនាំពាក្យក្រសួងការពារជាតិ លោក ឈុំ សុជាត បាននៅឡើយកាលពីម្សិលមិញ។ក្នុងលិខិតអបអរសាទរដល់នាយកឧត្តមសេនីយ៍ ហ៊ុន ម៉ាណែត ដែលត្រូវបានសារព័ត៌មាន Fresh News ចេញផ្សាយកាលពីថ្ងៃទី១៧ ខែមីនា ឆ្នាំ២០២៣ លោក ឈុំ សុជាត បានបញ្ជាក់ថា ការដំឡើង ឋានន្តរស័ក្តិថ្នាក់ នាយឧត្តមសេនីយ៍ នេះពិតជាស័ក្តិសមនឹងសមត្ថភាព ស្នាដៃ សមិទ្ធផល និងការលះបង់ដ៏ធំធេងមិនអាចកាត់ថ្លៃបាន ដើម្បីចូលរួមអភិវឌ្ឍ និងពង្រឹងសមត្ថភាពកងយោធពលខេមរភូមិន្ទ ក៏ដូចជាចូលរួមថែរក្សាការពារ និងអភិវឌ្ឍជាតិកម្ពុជាឱ្យកាន់តែខ្លាំងក្លា និងមានកេរ្តិ៍ឈ្មោះល្បីសុះសាយបន្តបន្ទាប់៕Khmer Times
សម្តេចនាយករដ្ឋមន្ត្រី ហ៊ុន សែន(ឆ្វេង)និងកូនប្រុសច្បងលោក ហ៊ុន ម៉ាណែត នៅមូលដ្ឋានយោធាក្នុងរាជធានីភ្នំពេញ ឆ្នាំ២០០៩។ រូបថត៖ AFP។
Post a Comment