កម្ពុជា-ដូមីនិកចុះហត្ថលេខាលើកិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនការទូតនិងផ្លូវការ
ក្រសួងការបរទេសកម្ពុជាបានថ្លែងនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថាប្រទេសកម្ពុជានិងប្រទេសដូមីនិកបានចុះហត្ថលេខាលើកិច្ចព្រមព្រៀងស្តីពីការលើកលែងតម្រូវការទិដ្ឋាការសម្រាប់អ្នកកាន់លិខិតឆ្លងដែនការទូតនិងផ្លូវការ។សេចក្តីថ្លែងការណ៍បានថ្លែងថាកិច្ចព្រមព្រៀងនេះត្រូវបានចុះហត្ថលេខាកាលពីថ្ងៃទី២៣ខែមីនា រវាងលោក អ៊ុច បូរិទ្ធ រដ្ឋមន្ត្រីក្រសួងការបរទេសស្តីទីកម្ពុជានិងរដ្ឋមន្ត្រីក្រសួងការបរទេស ធុរកិច្ចអន្តរជាតិ ពាណិជ្ជកម្ម និងថាមពលនៃប្រទេសដូមីនិកលោក Vince Henderson ក្នុងដំណើរទស្សនកិច្ចនៅកម្ពុជានៅថ្ងៃទី ២៣ និង ២៤ ខែមីនា។សេចក្តីថ្លែងការណ៍បានឱ្យដឹងថា មុនពេលពិធីចុះហត្ថលេខានេះ ភាគីទាំង២បានបើកកិច្ចប្រជុំមួយដើម្បីពិភាក្សាអំពីវិធីរិះរកសក្តានុពលក្នុងវិស័យពាណិជ្ជកម្ម និងការវិនិយោគ កសិកម្ម បណ្តុះបណ្តាលបច្ចេកទេស និងវិជ្ជាជីវៈ អេកូទេសចរណ៍ និងបដិសណ្ឋារកិច្ច។សេចក្តីថ្លែងការណ៍បានថ្លែងថា “ពួកគេបានឯកភាពជាគោលការណ៍ដើម្បីស្វែងយល់ពីលទ្ធភាពនៃការបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសទាំង២ហើយបានយល់ព្រមគាំទ្រគ្នាទៅវិញទៅមកនៅក្នុងវេទិកាពហុភាគី។ជាពិសេសក្នុងប្រព័ន្ធអង្គការសហប្រជាជាតិ”។សេចក្តីថ្លែងការណ៍បានបន្ថែមថា កាលពីថ្ងៃសុក្រ លោក Henderson ក៏បានចូលជួបសម្តែងការគួរសមជាមួយសម្តេចនាយករដ្ឋមន្ត្រី ហ៊ុន សែន នៅវិមានសន្តិភាព ក្នុងអំឡុងពេលដែលសម្តេចហ៊ុន សែន បានស្វាគមន៍ចំពោះការចុះហត្ថលេខាលើកិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនការទូតនិងផ្លូវការ។កម្ពុជានិងប្រទេសដូមីនិកក៏បានបង្ហាញចេតនាក្នុងការពង្រឹងនិងពង្រីកកិច្ចសហប្រតិបត្តិការលើវិស័យកសិកម្មនិងនេសាទ។គោលបំណងនេះត្រូវបានគូសបញ្ជាក់នៅក្នុងជំនួបនៅវិមានសន្តិភាពរវាងសម្តេចនាយករដ្ឋមន្ត្រី ហ៊ុន សែន និងលោកបណ្ឌិត Henderson រដ្ឋមន្ត្រីក្រសួងការបរទេស ធុរកិច្ចអន្តរជាតិ ពាណិជ្ជកម្ម និងថាមពលនៃ ប្រទេសដូមីនិក៕Xinhua/KhmerTime
លោកបណ្ឌិត Vince Henderson រដ្ឋមន្ត្រីក្រសួងការបរទេស ធុរកិច្ចអន្តរជាតិ ពាណិជ្ជកម្ម និងថាមពលនៃប្រទេសដូមីនិកនិងសម្តេចនាយករដ្ឋមន្ត្រី ហ៊ុន សែន នៅវិមានសន្តិភាព។
Post a Comment