ឆាណែល«តេឡេក្រាម»នាយកររដ្ឋមន្ត្រីកម្ពុជាជាប់លេខ២លើលោក
សម្តេចនាយករដ្ឋមន្ត្រី ហ៊ុន សែនបាននិយាយពីម្សិលមិញថាឆាណែលតេឡេក្រាមរបស់សម្តេចជាប់ចំណាត់ថ្នាក់លេខ២នៅលើពិភពលោក បន្ទាប់ពីឆាណែលតេឡេក្រាមរបស់ប្រធានាធិបតីអ៊ុយក្រែនដែលមានអ្នកភ្ជាប់ច្រើនជាងគេ។ការលើកឡើងរបស់សម្តេចនាយករដ្ឋមន្ត្រី ហ៊ុន សែន ធ្វើឡើងនៅក្នុងពិធីជួបសំណេះសំណាលជាមួយពលរដ្ឋក្នុងឃុំប្រម៉ោយ ស្រុកវាលវែង ខេត្តពោធិ៍សាត់ កាលពីម្សិលមិញ។សម្តេចនិយាយថា៖ «ឥឡូវនេះឆាណែលតេឡេក្រាមរបស់ខ្ញុំជាប់ចំណាត់ថ្នាក់លេខ២នៅលើពិភពលោក ដែលមានមនុស្ស ៦១៧ ២២០នាក់បានភ្ជាប់ចូលមកក្នុងឆាណែលតេឡេក្រាមរបស់ខ្ញុំ ហើយអ្នកដែលច្រើនជាងខ្ញុំ គឺឆាណែលតេឡេក្រាមរបស់ប្រធានាធិបតីអ៊ុយក្រែនដែលមានមនុស្សជាង ៩០០ ០០០នាក់ ដោយសារតែប្រទេសរបស់គាត់មានសង្គ្រាម ។ដូច្នេះហើយបានជាប្រជាពលរដ្ឋភ្ជាប់ឆាណែលតេឡេក្រាមរបស់គាត់»។សម្តេចបានបញ្ជាក់ថាសម្តេចនឹងចាក់បញ្ចាំងខ្សែភាពយន្ត “កូនប្រុសក្រោមពន្លឺព្រះចន្ទពេញបូរមីណ៍”ក្នុងឆាណែលតេឡេក្រាមរបស់សម្តេចបន្ទាប់ពីការចាក់បញ្ចាំងតាមកញ្ចក់ទូរទស្សន៍ក្នុងមួយសប្ដាហ៍ចំនួនបីភាគ ដែលការចាក់បញ្ចាំងនឹងចាប់ពីថ្ងៃទី២០ ខែមីនា ឆ្នាំ២០២៣។សម្តេចបន្តថា៖ «ប្រជាពលរដ្ឋអាចភ្ជាប់មកកាន់ឆាណែលតេឡេក្រាមរបស់ខ្ញុំ ដើម្បីទស្សនាខ្សែភាពយន្ត “កូនប្រុសក្រោមពន្លឺព្រះចន្ទពេញបូរមីណ៍”ហើយថែមទាំងបានទទួលព័ត៌មានផ្សេងៗនិងភ្លាមៗពីនាយករដ្ឋមន្ត្រីផងដែរ»។សម្តេចបន្ថែមថា៖«ខ្ញុំមិនបានជាការឃោសនាភ្ជាប់ឆាណែលតេឡេក្រាមរបស់ខ្ញុំទេ។ប៉ុន្តែការភ្ជាប់ពិតជាមានប្រយោជន៍។ អ្នកប្រឆាំងក៏អាចភ្ជាប់បាននរណាក៏អាចភ្ជាប់បានដែរ ហើយគ្មាននរណាម្នាក់អាចមករំខានខ្ញុំបានដែរ។ ព្រោះវាជាឆាណែលគឺមានតែខ្ញុំទេដែលមានសិទ្ធិអាចបង្ហោះវាបាន»។សម្តេចថ្លែងថា ចំពោះរឿងនេះ បន្តិចទៀតច្បាស់ជាមានមនុស្សម្នាក់ចេញមុខមកច្រណែនលោកជាក់ជាមិនខាន ដោយសារកន្លងមកគ្រាន់ការលេងហ្វេសប៊ុកចាញ់សម្តេចក៏បុគ្គលនោះចេញមុខរករឿងសម្តេចដែរ។ទោះបីជាសម្តេចថ្លែងដោយមិនបញ្ចេញឈ្មោះ ក៏គេអាចដឹងបានដែរថា សម្តេចនាយករដ្ឋមន្ត្រី ហ៊ុន សែន កំពុងតែនិយាយសំដៅដល់លោក សម រង្ស៊ី អតីតគណបក្សសង្គ្រោះជាតិដែលកំពុងរស់នៅប្រទេសបារាំង ហើយតែងតែរិះគន់មកកាន់សម្តេច។លោក អ៊ឹម សុធី នាយកប្រតិបត្តិក្រុមប្រឹក្សាយុវជនកម្ពុជា (YCC) បាននិយាយថាបច្ចុប្បន្ននេះ ការប្រើប្រាស់ប្រព័ន្ធអ៊ីនធឺណិតតាមរយៈកម្មវិធីឌីជីថលផ្សេងៗ គឺមានលក្ខណៈទូលំទូលាយជាខ្លាំង ហើយគ្មានអ្វីចម្លែកទេ ប្រសិនបើក្រុមហ៊ុនតេឡេក្រាមបញ្ជាក់ថា ឆាណែលតេឡេក្រាមរបស់សម្តេចនាយករដ្ឋមន្ត្រី ហ៊ុន សែន ជាប់ចំណាត់ថ្នាក់លេខ២ ដែលមានអ្នកតាមដានច្រើនជាងគេនៅលើពិភពលោកនោះ។សម្តេចបញ្ជាក់ថា នៅក្នុងប្រទេសមួយចំនួននៅលើពិភពលោក ជាពិសេសប្រទេសដែលមានបច្ចេកវិទ្យារីកចម្រើនខ្លាំង គេបានបង្កើតប្រព័ន្ធទំនាក់ទំនងគ្នាដោយខ្លួនឯង ហើយដាក់ដំណើរការឱ្យប្រើប្រាស់យ៉ាងទូលំទូលាយនៅទូទាំងពិភពលោក។ ជាក់ស្ដែងនៅតេឡេក្រាមជាកម្មវិធីទំនាក់ទំនងរបស់ប្រទេសរុស្ស៊ី ចំណែក Signal ជារបស់ប្រទេសអាមេរិកជាដើម។សម្តេចបន្តថា ដោយសារកម្ពុជាមិនទាន់ការបង្កើតកម្មវិធីទំនាក់ទំនងតាមប្រព័ន្ធអ៊ីនធើណិតដូចប្រទេសគេ ។ដូច្នេះប្រជាជនបានប្រើប្រាស់កម្មវិធីទំនាក់ទំនងរបស់ប្រទេសដទៃទៅតាមចំណង់ចំណូលចិត្តរបស់ពួកគេ។ ប៉ុន្តែតាមការកត់សម្គាល់ឃើញថាប្រជាជនកម្ពុជានិយមប្រើប្រាស់ហ្វេសប៊ុកនិងតេឡេក្រាមច្រើនជាងគេក្នុងចំណោមកម្មវិធីដទៃទៀត៕Khmer Times
បុរសម្នាក់កំពុងមើលឆាណែលរបស់សម្តេចនាយករដ្ឋមន្រ្តី ហ៊ុន សែន លើទូរស័ព្ទស្មាតហ្វូន។ខ្មែរថាមស៍៖ប៉ាន់ រចនា
Post a Comment