នាយក​រដ្ឋមន្ត្រីកម្ពុជា​៖​រដូវតថ្លៃបានមក​ដល់ហើយ

សម្តេចហ៊ុន សែននាយករដ្ឋមន្ត្រីនៃកម្ពុជា​បាន​លើកឡើងថារដូវតថ្លៃបានមកដល់ហើយចាប់ពីពេលនេះរហូតដល់ថ្ងៃ២៣ខែកក្កដាឆ្នាំ២០២៣ខណៈនៅជិតដល់ការបោះឆ្នោតគឺមានអ្នកដើរសន្យាជាមួយនឹងប្រជាជនដោយ​សន្យាផ្ដល់នេះផ្ដល់នោះឱ្យប្រជាជន។ ការលើកឡើងរបស់សម្ដេចនាយករដ្ឋមន្រ្ដីនេះ ក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្ស និស្សិតវិទ្យាស្ថានខ្មែរជំនាន់ថ្មីចំនួន ១ ៧២៨ នាក់ នាព្រឹកថ្ងៃទី០៦ ខែមីនា ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍អន្តរ​ជាតិ​ជ្រោយចង្វារ រាជធានីភ្នំពេញ។សម្ដេចហ៊ុន សែន បានថ្លែងថាអ្នកខ្លះជិះតែកង់សោះទៅសន្យា​ថាពេលខ្លួ​នឈ្នះ​ឆ្នោតនឹងផ្ដល់ម៉ូតូអ្នកខ្លះ​នៅផ្ទះ​ស្បូវទៅសន្យាផ្តល់ផ្ទះថ្មឱ្យប្រជាជន។ ឯអ្នកខ្លះទៀតទៅសន្យាផ្ដល់តួនាទីជាមេឃុំមេស្រុកឬចៅហ្វាយ​ខេត្ត ខណៈដែលខ្លួន​ឯងមិនទាន់មានអ្វី​សោះ។ជាមួយគ្នានេះ សម្តេចក៏សូមផ្ដាំទៅអ្នកដទៃដែលមិនមែនជា​ខ្មែរកុំតាំងខ្លួនជា​អ្នក​ស្រឡាញ់ខ្មែរជាងខ្មែរព្រោះពេលមានសង្រ្គាមពួកគេរត់ចោលខ្មែរអស់ ទុកឱ្យខ្មែររងទុក្ខនិងស្លាប់យ៉ាងច្រើន។ប៉ុន្តែនៅពេលខ្មែរមានសន្តិភាពក៏តាំងមកកង្វល់នេះកង្វល់នោះទៅវិញ។សម្តេចនាយករដ្ឋមន្រ្ដីសង្ឃឹមថា អ្វីដែលសម្តេចនិយាយនេះគឺជាការដាស់តឿន​ដល់​អ្នក​ដែល​កសាងកំហុសទីមួយឱ្យកម្ពុជាដែលបានគាំទ្ររដ្ឋប្រហារទម្លាក់សម្តេចព្រះ នរោត្តម សីហនុធ្វើឱ្យប្រទេសកម្ពុជារងនូវ​សង្រ្គាម។ សម្តេចបានបន្ដថា ប្រទេសណា​ក៏ដោយដែលបានគាំទ្ររដ្ឋ​ប្រហារ​ទម្លាក់សម្ដេចព្រះនរោត្តម សីហនុ នៅឆ្នាំ១៩៧០សុទ្ធតែ​មាន​ចំណែកទាំងអស់នៃការដុតកម្លោច​សង្គ្រាមនៅ​កម្ពុជា។សម្ដេចអះអាងថា៖«​តាំង​ខ្លួន​ជាប្រទេសប្រជាធិបតេយ្យ។ប៉ុន្តែគាំទ្ររដ្ឋប្រហារ។ ដូចនេះសូមកុំ​និយាយ​ពីប្រជាធិបតេយ្យ​តទៅ​ទៀតហើយបើសិនជាអ្នកក្រោយត្រឡប់មកមើលពីអតីតកាលដែល​អ្នក​បានគាំទ្ររដ្ឋ​ប្រហារទម្លាក់សម្ដេចព្រះនរោត្តម សីហនុ»។ សម្តេចនាយករដ្ឋមន្រ្ដីក៏បានសុំឱ្យប្រទេសដែលគាំទ្ររដ្ឋប្រហារឆ្នាំ១៩៧០និងគាំទ្រខ្មែរក្រហមនៅអង្គការសហប្រជាជាតិអស់១២ឆ្នាំ សូមកុំកសាងកំហុសទី៣សម្រាប់​កម្ពុជា​បន្តទៅទៀត។ សម្ដេចបានថ្លែង​បញ្ជាក់បន្ថែមថា៖«យើងមិនអត់ឱនឱ្យប្រទេសណា​ទាំង​អស់ដែល​ប៉ុនប៉ុងបង្កើតឱ្យមានសង្គ្រាម​នៅកម្ពុជាឡើងវិញ ទោះតម្លៃណាក៏ដោយយើង​ត្រូវការពារសន្តិភាពឱ្យបាន»៕AKP