នាយ​​ក​រដ្ឋមន្ត្រី​ថ្មី​របស់​ប្រទេស​​ចិ​ន​បាន​ទទួល​ស្គាល់​ថា​វា​​មិន​ងាយ​ស្រួល​ក្នុង​​ការ​សម្រេច​បាន​​គោលដៅ​សេដ្ឋកិច្ច​ទេ​(AFP,Reuters)

 នាយករដ្ឋមន្ត្រីថ្មីលោកLiQiangបាននិយាយថាគោលដៅនៃកំណើនសេដ្ឋកិច្ច ៥%របស់ប្រទេសចិននៅឆ្នាំនេះមិនងាយស្រួលសម្រេចនោះទេនៅពេលដែលប្រទេសនេះប្រឈមមុខនឹងបញ្ហាជាច្រើន។លោក Li Qiang បាននិយាយនៅក្នុងសន្និសីទសារព័ត៌មានមួយថា"គោលដៅនៃកំណើនប្រហែល៥%ត្រូវបានកំណត់បន្ទាប់ពីការវាយតម្លៃដ៏ទូលំទូលាយនៃកត្តាជាច្រើន ។ប៉ុន្តែខ្ញុំខ្លាចថាការសម្រេចបានវាមិនមែនជាកិច្ចការងាយស្រួលនោះទេ ដែលទាមទារឱ្យពួកយើងខិតខំប្រឹងប្រែងបន្ថែមទៀត" ។នៅទីក្រុងប៉េកាំងថ្ងៃនេះ។លោកLiបាននិយាយថាឆ្នាំនេះប្រទេសចិនប្រឈមមុខនឹង"បញ្ហាប្រឈមថ្មីជាច្រើន"នៅក្នុងកំណើនសេដ្ឋកិច្ចហើយប្រជាជននឹងយកចិត្តទុកដាក់បន្ថែមទៀតចំពោះបញ្ហាជិតស្និទ្ធដូចជាលំនៅដ្ឋានការងារ ប្រាក់ចំណូលការអប់រំនិងការថែទាំសុខភាព ជំនួសឱ្យតួលេខGDP ។នាយករដ្ឋមន្ត្រីចិនក៏បានរិះគន់គោលនយោបាយរបស់អាមេរិកដោយនិយាយថាសកម្មភាពនៃការឡោមព័ទ្ធនិងការបង្ខិតបង្ខំមិនបាននាំមកនូវផលប្រយោជន៍ដល់ភាគីណាមួយឡើយ។លោកបាននិយាយថា "ចិន និងអាមេរិកគួរតែសហការហើយត្រូវតែសហការ។នៅពេលដែលប្រទេសទាំង២សហការគ្នាយើងអាចធ្វើកិច្ចការជាច្រើន"។លោក Li បានធ្វើការអត្ថាធិប្បាយបន្ទាប់ពីអ្នកកាន់តំណែងមុនរបស់លោក Li Keqiang បាននិយាយកាលពីថ្ងៃទី៥ខែមីនាថារដ្ឋាភិបាលចិនបានកំណត់ទិសដៅកំណើនផលិតផលក្នុងស្រុកសរុប"ប្រហែល៥%"នៅឆ្នាំ២០២៣ដែលជាកម្រិតទាបបំផុតក្នុងរយៈពេលជាង៣០ឆ្នាំរបស់ប្រទេសចិន។សេដ្ឋកិច្ចរបស់ប្រទេសចិននៅឆ្នាំ២០២២នឹងកើនឡើង៣%ទាបជាងគោលដៅដែលបានកំណត់៥.៥%ភាគច្រើនដោយសារតែឥទ្ធិពលនៃគោលនយោបាយឆ្លើយតបទៅនឹងCovid-19។ក្រុមអ្នកសង្កេតការណ៍បាននិយាយថា នៅពីក្រោយគោលដៅកំណើនតិចតួចក្នុងឆ្នាំនេះគឺការប្រុងប្រយ័ត្នដ៏គួរឱ្យកត់សម្គាល់របស់ថ្នាក់ដឹកនាំចិនក្នុងបរិបទនៃស្ថានការណ៍ពិភពលោកដ៏ស្មុគស្មាញនិងការបង្កើនការប្រកួតប្រជែងមហាអំណាចជាមួយសហរដ្ឋអាមេរិក។ដោយសំដៅទៅលើCovid-19 លោកLi ថ្ងៃនេះបានប្រកាសថាប្រទេសចិនបានឈ្នះជំងឺរាតត្បាតដោយចំណាយពេលតិចជាង២ខែសម្រាប់ "ការផ្លាស់ប្តូរដោយរលូន" ក្នុងរបៀបឆ្លើយតប និងអនុវត្តវិធានការត្រួតពិនិត្យនិងបង្ការឱ្យបានត្រឹមត្រូវ៕

លោក Li Qiangនាយក​រដ្ឋមន្ត្រី​ចិន​ក្នុង​សន្និសីទ​កាសែត​នៅ​មហាសាល​ប្រជាជន​ក្រុង​ប៉េកាំង​ថ្ងៃ​ទី​១៣ មីនា។ រូបថត៖Reuters