នាយ​ក​រដ្ឋមន្ត្រី​កម្ពុជាត្រូវ​ជន​​មិ​ន​ស្គាល់​អត្តសញ្ញាណ​មា​ន​ប្រភព​នៅ​​តៃ​វ៉ាន់​ឱ្យ​ផ្ញើ​លុយ​តា​ម​A​B​A​

សម្តេចនាយក​រដ្ឋ​ម​ន្រ្តីហ៊ុន​ ​សែន​ត្រូវ​ជន​មិន​ស្គាល់​អត្តសញ្ញាណ​ដែល​ប្រើប្រាស់​លេខ​ប្រទេស​ឡាវ​និង​មាន​ប្រភព​ចេញពី​​តៃ​វ៉ាន់​បាន​ផ្ញើ​សារ​តាម​តេឡេក្រាម​ឱ្យ​សម្តេច​ផ្ញើ​លុយ​ចូល​គណនី​​A​B​A​ដើម្បី​ប្រើប្រាស់​ជា​ប្រយោជន៍ផ្ទាល់ខ្លួន​។​កាលពី​យប់​ថ្ងៃអាទិត្យ​សម្តេច​នាយករដ្ឋមន្ត្រី​បាន​លើក​ឡើង​ថា​​មាន​ករណី​ល្បិច​បោកប្រាស់​មួយ​នៅ​ក្រៅ​ប្រទេស​បាន​ផ្ញើ​សារ​មក​សម្តេចដើម្បី​ឱ្យ​បាញ់​លុយ​ទៅ​ពួក​គេ​តាមរយៈ​ការ​បន្លំ​ប្រើប្រាស់​រូប​របស់​ជន​ជាតិខ្មែរ​ ​នៅ​លើ​ ​Profile​ ​Telegram​។ប៉ុន្តែ​ធាតុ​ពិត​ជន​ឆបោក​នេះ​ឈរ​ជើង​នៅ​តៃ​វ៉ាន់​ ​ហើយ​លេខ​ដែល​ពួក​គេ​ប្រើ​នោះ​ជា​លេខ​របស់​ប្រទេស​ឡាវ​។​សម្តេច​បញ្ជាក់​ថា​៖​​«​ជនជាតិ​ជា​ទីស្រឡាញ់​ ​ឥឡូវ​មាន​ល្បិច​បោកប្រាស់​ ​ដែល​ករណី​នេះ​ ​ខ្លួនខ្ញុំ​មុននេះ​ប្រហែល​មួយម៉ោង​គឺ​មានការ​ផ្ញើ​សារ​ជា​ភាសា​អង់គ្លេស​ ​ដើម្បី​ឱ្យ​ខ្ញុំ​ផ្ញើ​លុយ​តាម​ ​A​B​A​ ​ដែល​ប្រើប្រាស់​ ​Profile​ ​ជា​លោក​ឧកញ៉ា​ ​ឃុន​ ​សៀ​។​ប៉ុន្តែ​លេខទូរសព្ទ​ ​៨​៥​៦​ ​ជា​លេខ​របស់​ប្រទេស​ឡាវ​»​។​សម្តេច​និយាយ​ថា​ ​ចំពោះ​ជន​ក្លែង​បន្លំ​ខាង​លើ​នេះ​ ​ប្រហែល​មិនបាន​ដឹង​ផ្ញើ​សារ​មក​លេខ​តេឡេក្រាម​របស់​សម្តេច​នេះ​ ​គឺជា​លេខទូរសព្ទ​របស់​នាយក​រដ្ឋ​ម​ន្រ្តី​ឡើយ​។​សម្តេចនាយក​រដ្ឋមន្ត្រី​បាន​អំពាវនាវ​ដល់​ស្ថាប័នរដ្ឋ​ ​និង​ឯកជន​ ​ជាពិសេស​ ​ប្រជាពលរដ្ឋ​ ​ត្រូវ​មាន​ការ​ប្រុងប្រយ័ត្ន​ខ្ពស់​ជាមួយនឹង​ករណី​ខាងលើ​នេះ​ ​ដើម្បី​កុំ​ឱ្យ​ចាញ់​បោក​ ​និង​ខាត​បង់ប្រយោជន៍​ច្រើន​ទៅ​លើ​ជន​បោក​ប្រាស់​ទាំង​ក្នុង​និង​ក្រៅ​ប្រទេស​។​ប្រធាន​នាយកដ្ឋាន​ប្រឆាំង​បទល្មើស​បច្ចេកវិទ្យា​ ​នៃ​ក្រសួង​មហាផ្ទៃ​ ​លោក​ ​ជា​ ​ពៅ​ ​បាន​លើក​ឡើង​យ៉ាង​ខ្លី​ថា​ ​បញ្ហា​ខាងលើ​នេះ​ ​មិនមែន​ជា​រឿង​ថ្មី​នោះ​ទេ​ ​គឺ​តែង​កើត​ឡើង​ចំពោះ​ប្រជាពលរដ្ឋ​មួយ​ចំនួន​នៅ​តាម​មូលដ្ឋាន​ ​ហើយ​សមត្ថកិច្ច​តែង​ចុះ​បង្ក្រាប​និង​ទប់​ស្កាត់​ផង​ដែរ​។​លោក​បញ្ជាក់​ថា​៖​ ​«​តាមការពិត​មិនមែន​ជា​រឿង​ថ្មី​អីណា​ ​ហើយ​កាលពី​កន្លងមក​សារ​ព័ត៌មាន​មួយ​ចំនួន​ក៏​ធ្លាប់​ចុះផ្សាយ​ព្រោង​ព្រៀ​ត​ផង​ដែរ​។ជាពិសេស​​ការ​ឆបោក​នៅ​តាម​ប្រព័ន្ធ​តេឡេក្រាម​»​។​កាលពី​ចុង​ឆ្នាំ​២​០​២​២​ សម្តេច​ស​ ​ខេង​ ​រដ្ឋមន្ត្រី​ក្រសួង​មហាផ្ទៃ​ ​បាន​និយាយ​ថា​ ​មួយ​រយៈ​ចុងក្រោយ​នេះ​ ​កម្ពុជា​ជា​កន្លែង​រងគ្រោះ​នៃ​បទល្មើស​ឆបោក​តាម​ប្រព័ន្ធ​ទូរគមនាគមន៍។​ ​សម្តេច​ថ្លែង​ថា​ ​បទល្មើស​ឆបោក​តាម​ប្រព័ន្ធ​ទូរគមនាគមន៍​ ​ដែល​កើត​នៅ​កម្ពុជា​ ​មិន​មែន​ជន​ជាតិខ្មែរ​ជា​អ្នក​ប្រព្រឹត្ត​នោះ​ទេ​ ​។ប៉ុន្តែ​អ្នក​ដែល​ប្រព្រឹត្ត​ ​និង​មេខ្យល់​ ​គឺ​ជនជាតិ​ផ្សេង​ដែល​កំពុង​រស់នៅ​ក្នុង​ប្រទេស​កម្ពុជា​។​កាលពី​ខែ​មករា​ ​ឆ្នាំ​២​០​២​៣​ ​នាយកដ្ឋាន​ព័ត៌មាន​វិទ្យា​ ​នៃ​ក្រសួង​មហាផ្ទៃ​ ​បាន​ឱ្យ​ដឹង​ថា​​ទន្ទឹម​នឹង​ការ​រីក​ចម្រើន​នៃ​បច្ចេកវិទ្យា​ឌី​ជី​ថល​បញ្ហា​ប្រឈម​ក៏បាន​កំពុ​កើតឡើងជា​រៀងរាល់ថ្ងៃ​ ​ដោយ​ជន​ខិលខូច​ឬ​ឧក្រិដ្ឋជន​បាន​ទាញ​យក​នូវបច្ចេកវិទ្យា​ជា​មធ្យោបាយ​ក្នុង​ប្រព្រឹត្តិ​អំពើ​ល្មើស​មាន​ដូចជា​ ​ធ្វើ​ការ​វាយប្រហារ​តាម​បណ្តាញ​អ៊ី​ន​ធឺ​ណិ​ត​ ​អំពើ​ឆបោក​ប្រាក់​ ​អំពើ​លួច​យក​នូវ​ទិន្នន័យ​ ​អំពើ​ក្លែង​អត្តសញ្ញាណ​ ​និង​អំពើ​ស៊ើប​ការ​សម្ងាត់​ផ្សេងៗ​។​នាយកដ្ឋាន​ខាងលើ​បាន​ជំរុញ​ដល់​ប្រជាពលរដ្ឋ​ ​ត្រូវ​ស្វែង​យល់​អំពី​បច្ចេកវិទ្យា​ដែល​ខ្លួន​កំពុង​ប្រើប្រាស់​ឱ្យ​បាន​ច្បាស់​មាន​ដូចជា​ ​Face​book​, ​Telegram​, ​Inst​a​gram​, ​Messenger​, ​What​sAp​p​ ​ព្រមទាំង​ ​ឧបករណ៍​បច្ចេកវិទ្យា​មួយ​ចំនួន​មាន​ដូចជា​ ​កុំព្យូទ័រ​ ​ទូរសព្ទ​ ​ទូរទស្សន៍​ ​និង​កា​ម៉េរ៉ា​សុវត្ថិភាព​ ​ជាដើម​។​​ប្រភព​ដដែល​ក៏បាន​អំពាវនាវ​ដល់​ប្រជាពលរដ្ឋ​ ​ត្រូវ​បង្កើន​ការ​ប្រុងប្រយ័ត្ន​ខ្ពស់​ចំពោះ​ជន​មិន​ស្គាល់​អត្តសញ្ញាណ​ច្បាស់​ ​ដែល​បាន​សន្យា​ផ្ញើ​ប្រាក់​ ​ឬ​វត្ថុ​មាន​តម្លៃ​មក​ពីក្រៅ​ប្រទេស​ ​ប៉ុន្តែ​ត្រូវ​ឱ្យ​ជនរងគ្រោះ​ផ្ញើ​ប្រាក់​ទៅ​ជនល្មើស​ជាមុន​សិន​ ​ដើម្បី​ផ្ញើ​ប្រាប់​ជាច្រើន​ត្រឡប់មក​ជនរងគ្រោះ​វិញ​។​នាយកដ្ឋាន​ ​បាន​ស្នើ​កុំ​លក់​ ​ឬ​ប្រគល់​លើ​ការ​គ្រប់គ្រង​គណនី​ធនាគារ​របស់​ខ្លួន​ទៅ​ឱ្យ​អ្នកដទៃ​ ​ឬ​ជន​មិនដែល​ស្គាល់​អត្តសញ្ញាណ​ ​ព្រោះ​អាច​ប្រឈម​មុខ​ពាក់ព័ន្ធ​នឹង​បទ​ផ្សំគំនិត​ ​ឬ​ផ្ដល់​មធ្យោបាយ​ឱ្យ​ជនល្មើស​ប្រព្រឹត្ត​បទល្មើស​បាន៕​Khmer Times

​រូបភាព​​Profile​ ​របស់​គណនី​តេលេ​ក្រាម​របស់​ជន​ដែល​ព្យាយាម​ឆរ​បោក​សម្តេចនាយក​រដ្ឋ​ម​ន្រ្តី​ហ៊ុន​ ​សែន​។​​រូបភាព​៖​ហ្វេ​ស​បុក​សម្តេច​ហ៊ុន​ ​សែន/Khmer Times