ជនសង្ស័យបន្លំយកមាសក្នុងទូ សារភាពយ៉ាងឡូយ ក្រោយគេចាប់ខ្លួនបាន
ខេត្តកំពង់ស្ពឺ ៖ មុខសញ្ញាលួចមាស២នាក់ប្ដីប្រពន្ធដែលសមត្ថកិច្ចឃាត់ខ្លួន ត្រូវបានកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធី។
ជនសង្ស័យទាំង២នាក់ប្តីប្រពន្ធខាងលើត្រូវបានឃាត់ខ្លួន ក្នុងករណីលួចមាស កាលពីថ្ងៃទី18 ខែកុម្ភៈ ឆ្នាំ2023 ក្រោយពេលធ្វើសកម្មភាពលួចបានមាសជាង10តម្លឹង ត្រង់ចំណុចផ្សារក្រាំងចេក ស្ថិតនៅភូមិគោកសណ្ដែក ឃុំក្រាំងចេក ស្រុកឧត្តុង ខេត្តកំពង់ស្ពឺ។
តាមប្រភពពីមន្ត្រីនគរបាលស្រុកបានឲ្យដឹងថា ជនសង្ស័យទាំង២នាក់ខាងលើ ក្នុងនោះម្នាក់ឈ្មោះស៊ឹម ឡេង ភេទស្រី អាយុ 55 ឆ្នាំ រស់នៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល និងម្នាក់ទៀតឈ្មោះឡោ ថុល ភេទប្រុស អាយុ56ឆ្នាំ រស់នៅភូមិមាន ឃុំមាន ស្រុកព្រៃឈរ ខេត្តកំពង់ចាម។
ជនសង្ស័យទាំង២នាក់បានធ្វើសកម្មភាពចូលលួចមាសនៅផ្ទះរបស់ជនរងគ្រោះឈ្មោះចុន ចម្រើនភេទប្រុស អាយុ43ឆ្នាំ មុខរបរលក់មាសនៅផ្សារក្រាំងចេក បច្ចុប្បន្នរស់នៅភូមិទួលស្តៅ ឃុំក្រាំងចេកស្រុកឧត្តុង ខេត្តកំពង់ស្ពឺ។
យោងតាមការបំភ្លឺរបស់ម្ចាស់ផ្ទះបានឲ្យដឹងថា ដំបូងឡើយគឺជនសង្ស័យបានធ្វើជាចូលទៅទិញរបស់របរនៅក្នុងផ្ទះរបស់គាត់ឆ្លៀតពេលដែលគាត់កំពុងតែរើសរបស់របរ ស្រាប់តែជនសង្ស័យជាស្ត្រីរូបនោះបានឆ្លៀតឱកាសលួចយកមាសដែលគាត់យកពីផ្ទះបំរុងដាក់តាំងក្នុងទូលក់មួយកញ្ចប់តែម្ដង ក្នុងនោះរួមមានខ្សែក១០ខ្សែ ក្រវិល៣០គូ បន្តោងខ្សែក ២០បន្តោង ។
ក្រោយពីជនសង្ស័យជាស្ត្រីរូបនោះចាកចេញពីផ្ទះរបស់គាត់ ប្រពន្ធរបស់លោកចុន ចម្រើន ហាក់មានការសង្ស័យក៏បើកមើលទូមាសរបស់ខ្លួនបាត់ ពេលនោះក៏រត់ដេញតាមស្រែកឆោឡោ និងចាប់បានជនសង្ស័យភ្លាមៗប្រគល់ឲ្យសមត្ថកិច្ចតែម្ដង។
ក្រោយទទួលយកជនសង្ស័យពីប្រជាពលរដ្ឋមក ក្នុងនោះសមត្ថកិច្ចដកហូតបានទូរសព្ទដៃ 4 គ្រឿងនាឡិកាដៃមួយគ្រឿង រថយន្តកាមរីហើម ពណ៌ស ស៊េរីឆ្នាំ93 របស់ជនសង្ស័យដែលជិះធ្វើសកម្មភាពនិងមាសចំនួន10តម្លឹង ។
ក្រោយពេលសមត្ថកិច្ចឃាត់ខ្លួន និងធ្វើការសួរនាំ ជនសង្ស័យសារភាពថា ឃើញម្ចាស់ទុកចោលក៏លួចតែម្តងទៅ ។
ជនសង្ស័យខាងលើបច្ចុប្បន្ននគរបាលស្រុកបានបញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធីក្រោយពីកសាងសំណុំរឿងរួចរាល់។
ចំណែកវត្ថុតាងមាស១០តម្លឹងដែលសមត្ថកិច្ចដកហូតពីជនសង្ស័យសមត្ថកិច្ចបានប្រគល់ជូនទៅម្ចាស់ដើមវិញហើយ។
យោងតាមប្រភពពីមន្ត្រីនគរបាលបានឱ្យដឹងថា មុខសញ្ញាទាំង២នាក់នេះធ្លាប់ជាប់ពន្ធនាគារតាមបណ្ដាខេត្តនានាជាច្រើនមកហើយ ក្នុងសកម្មភាពចូលទិញអីវ៉ាន់ហើយបន្លំលួចមាសរបស់គេបែបនេះ មុខសញ្ញាទាំង២នាក់នេះគឺជាមុខសញ្ញាចាស់ និងជាមុខសញ្ញាមិនរាងចាល ៕
/unnamed.png
Post a Comment