សម្តេចហ៊ុន សែនស្នើឱ្យឈប់វាយប្រហារអ្នកធ្លាប់គាំទ្រនិន្នាការប្រឆាំងប្ដូរមកគាំទ្ររដ្ឋាភិបាល
សម្តេចនាយករដ្ឋមន្ត្រី ហ៊ុន សែន បានស្នើឱ្យគ្រប់បក្សនយោបាយនិងភាគីពាក់ព័ន្ធបញ្ឈប់វប្បធម៌វាយប្រហារអតីតអ្នកធ្លាប់គាំទ្រនិន្នាការប្រឆាំងហើយបានផ្លាស់ប្ដូរមកគាំទ្ររដ្ឋាភិបាលដើម្បីអនុវត្តលទ្ធិប្រជាធិបតេយ្យនិងសិទ្ធិសេរីភាពរបស់ពលរដ្ឋ។ក្នុងពិធីអបអរសាទរទិវាជាតិទីក្រុងស្អាតលើកទី១១ កាលពីថ្ងៃទី២៧ ខែកុម្ភៈ ឆ្នាំ២០២៣ សម្តេចហ៊ុន សែន បានលើកឡើងថា បច្ចុប្បន្នយុវជនដែលធ្លាប់មាននិន្នាការប្រឆាំងរដ្ឋាភិបាល បានសម្រេចផ្លាស់ប្ដូរមកគាំទ្ររដ្ឋាភិបាល ហើយបានអនុវត្តគម្រោងនានា ដើម្បីប្រយោជន៍ដល់បរិស្ថាននិងសង្គមជាតិ។សម្តេចថា៖ «នៅពេលចលនានេះប្តូរទិសពីការគាំទ្រក្រុមប្រឆាំង បែរជាមានការវាយប្រហារពីក្រុមប្រឆាំង ទៅលើយុវជនកូនៗទាំងនេះ នេះជាការខ្វះការគោរពភាពប្រជាធិបតេយ្យ»។សម្តេចហ៊ុន សែន អះអាងថា ក្រុមយុវជនដែលបានផ្លាស់ប្ដូរមកគាំទ្ររដ្ឋាភិបាល ពួកគេបានយល់ថា ពេលនេះអ្វីដែលជាជម្រើសល្អជាងគេ គឺគាំទ្ររដ្ឋាភិបាល ដើម្បីអនុវត្តគម្រោងនានាពាក់ព័ន្ធនឹងការពារធនធានធម្មជាតិ បរិស្ថាន និងសកម្មភាពមួយចំនួន ដែលពួកគេយល់ថា ចូលរួមបម្រើជាតិ បន្ទាប់ពីនៅជាមួយក្រុមប្រឆាំង ដែលមិនទទួលបានលទ្ធផលអ្វីទាំងអស់។សម្តេចនាយករដ្ឋមន្ត្រីបន្ថែមថា បើគិតដល់ដំណើរការប្រជាធិបតេយ្យ និងសិទ្ធិរបស់ពលរដ្ឋចំពោះបញ្ហានយោបាយ សូមកុំវាយប្រហារក្រុមយុវជនទាំងនេះ។ សម្តេចបន្តថា៖ «វាមិនមែនប្រជាធិបតេយ្យទេ នៅពេលដែលគេគាំទ្រអ្នកឯង អ្នកឯងចាត់ទុកថា គេល្អ ដល់ពេលដែលគេមើលឃើញថា ល្អបំផុត គឺចូលរួមជាមួយរាជរដ្ឋាភិបាល ដើម្បីធ្វើសកម្មភាព អ្នកឯងចាត់ទុកថា គេក្បត់លក់ឧត្តមគតិ»។សម្តេចនិយាយថា រដ្ឋាភិបាលបានផ្តល់ឱកាសដល់ក្រុមយុវជនដែលធ្លាប់គាំទ្រក្រុមប្រឆាំងគឺអនុញ្ញាតអាចធ្វើអ្វីដែលពួកគេចង់ធ្វើ ដើម្បីចូលរួមជួយវិស័យបរិស្ថាន និងសង្គម។ សម្តេចបញ្ជាក់ថា រដ្ឋាភិបាលមិនដែលបានចាត់ទុកក្រុមយុវជនទាំងជាសត្រូវនោះទេ ហើយបានអំពាវនាវឱ្យបណ្តាបក្សនយោបាយ និងអ្នកនយោបាយ កុំលាបពណ៌ទៅលើក្រុមយុវជនទាំងនោះ។សម្តេចនាយករដ្ឋមន្ត្រី ហ៊ុន សែន បានថ្លែងថាបន្តិចទៀតនៅពេលមានសមាជិកក្រុមប្រឆាំងចូលរួមជាមួយរដ្ឋាភិបាលបន្តទៀត នឹងបន្តរកការរិះគន់ថា លក់ក្បាលឱ្យរដ្ឋាភិបាលជាមិនខាន។សម្តេចនិយាយថា ការរិះគន់ និងវាយប្រហារទៅលើក្រុមយុវជនទាំងនោះ នឹងអាចឱ្យពួកគេទ្រាំមិនបាន ហើយឆ្លើយតបតទៅវិញផងដែរ។កាលពីម្សិលមិញ អតីតសហស្ថាបនិកចលនាមាតាធម្មជាតិ លោក ម៉េង ហេង បានចេញវីដេអូឃ្លីបប្រកាសបង្កើតអង្គការមាតាធម្មជាតិ ដើម្បីចូលរួមលើកស្ទួយវិស័យបរិស្ថាន ការពារសន្តិភាពនិងការអភិវឌ្ឍ។លោកបញ្ជាក់ថា រដ្ឋាភិបាល បានចេញគោលនយោបាយក្រោមការដឹកនាំរបស់សម្តេចនាយករដ្ឋមន្ត្រី ហ៊ុន សែន បានផ្តល់ឱកាសដល់លោកចូលរួមក្នុងការការពារបរិស្ថាន។ លោកបានអំពាវនាវដល់សមាជិកចលនាមាតាធម្មជាតិទាំងអស់ចូលរួមជាមួយលោក ដើម្បីលើកស្ទួយវិស័យបរិស្ថាន។លោកអះអាងថា៖ «ខ្ញុំចូលរួមនេះ ដោយសារតែកន្លងមក ខ្ញុំបាទធ្វើសកម្មភាពសង្គមមិនបានពេញលេញទៅតាមសមត្ថភាព និងមិនបានយល់ដឹងស៊ីជម្រៅអំពីគោលនយោបាយការពារបរិស្ថានរបស់រាជរដ្ឋាភិបាល ជាហេតុធ្វើឱ្យខ្ញុំបាទ ធ្វើសកម្មភាពសង្គម ដើរផ្ទុយនឹងច្បាប់ដែលបានចែង»។កាលពីខែមករា ឆ្នាំ២០២៣ សកម្មជនការពារបរិស្ថាន និងជាអ្នកធ្លាប់តស៊ូមតិស្វែងរកយុត្តិធម៌ជូន លោក កែម ឡី អតីតអ្នកវិភាគនយោបាយឯករាជ្យ គឺលោក ជុំ ហួត និងលោក ជុំ ហួរ ត្រូវបានរដ្ឋាភិបាល តាមរយៈក្រសួងមុខងារសាធារណៈ ត្រូវបានតែងតាំងជាជំនួយការក្រសួងប្រៃសណីយ៍និងទូរគមនាគមន៍ ដែលមានឋានៈស្មើអនុប្រធាននាយកដ្ឋាន។លោក ជុំ ហួត និងលោក ជុំ ហួរ ក៏ធ្លាប់ភៀសខ្លួនចាកចេញពីកម្ពុជាផងដែរ ដោយសារបារម្ភរឿងតាមចាប់ខ្លួនពីអាជ្ញាធរ បន្ទាប់ពីធ្វើសកម្មភាពតស៊ូមតិពាក់ព័ន្ធការពារបរិស្ថាន និងករណីឃាតកម្មលោក កែម ឡី។អ្នកទាំង២ក៏ជាអតីតមន្ត្រីគណបក្សខ្មែរស្រឡាញ់ជាតិ ដែលថ្នាក់ដឹកនាំគណបក្សនេះ បានប្រកាសរំលាយកាលពីឆ្នាំ២០២២ មុននឹងចូលរួមជីវភាពនយោបាយជាមួយរដ្ឋាភិបាល ដោយភាគច្រើនពួកគេទទួលបានតួនាទីចាប់ពីអនុប្រធាននាយកដ្ឋាន រហូតដល់រដ្ឋលេខាធិការ នៅក្រសួងមួយចំនួនផងដែរ៕Khmer Times
លោក ជុំ ហួត និងលោក ជុំ ហួរ ក្នុងជំនួបជាមួយរដ្ឋមន្ត្រីក្រសួងបរិស្ថាន កាលពីខែមករា។ រូបភាព៖ជុំ ហួត និង ជុំ ហួរ/Khmer Times
/unnamed.png
Post a Comment