កម្ពុជា​បង្ហាញការបារម្ភ​នៅពេ​លដែលក​ម្ពុជា​ចាកចេញ​ពីប្រទេសអភិ​វឌ្ឍន៍តិចតួច

 សម្តេចនាយករដ្ឋមន្ត្រីហ៊ុនសែននៅក្នុងពិធីចែកសញ្ញាបត្រដល់និស្សិតនៃវិទ្យាស្ថានជាតិបណ្តុះបណ្តាលបច្ចេកទេសនាព្រឹកថ្ងៃចន្ទនេះបានសម្តែងនូវការព្រួយបារម្ភនៅពេលដែលប្រទេសកម្ពុជាចាកចេញពីប្រទេសដែលមានការអភិវឌ្ឍន៍តិចតួចនៅពេលឆាប់ៗខាងមុខទៅជាប្រទេសដែលមានចំណូលមធ្យមកំរិតទាប។ជាមួយនឹងការស្នើសុំឲ្យប្រទេសនានាផ្តល់ភាពអនុគ្រោះបន្តទៀតសម្តេចនាយករដ្ឋមន្ត្រីឲ្យដឹងថាគេនឹងយកអត្រាការប្រាក់បែបពាណិជ្ជកម្មពីកម្ពុជានៅពេលកម្ពុជាខ្ចីលុយគេក្នុងឋានៈជាប្រទេសដែលមានចំណូលមធ្យមកំរិតទាបពោលគឺលែងជាអត្រាការប្រាក់សម្បទានទៀតហើយ។សម្តេចហ៊ុនសែនបានបញ្ជាក់ថាសម្ដេចមានការព្រួយបារម្ភនៅពេលដែលប្រទេសកម្ពុជាចាកចេញពីប្រទេសអភិវឌ្ឍន៍តិចតួចនាពេលខាងមុខ។ ការ​បញ្ជាក់​របស់​សម្ដេចនេះ ក្នុងពិធីប្រគល់សញ្ញាបត្រ​ដល់​និស្សិតបច្ចេកវិទ្យា និង គរុ​និស្សិតបច្ចេកទេស ជ័យលាភីនៃវិទ្យាស្ថានជាតិបណ្តុះ​បណ្តាល​បច្ចេកទេស(NTTI)សរុប ចំនួន ៥ ៤៥០ នាក់ ដែលធ្វើឡើងនៅមណ្ឌលសន្និបាត និង​ពិព័រណ៍​អន្តរ​ជាតិជ្រោយចង្វារ នាព្រឹកថ្ងៃទី២៧ ខែកុម្ភៈ ឆ្នាំ២០២៣។សម្តេចហ៊ុន សែន បានថ្លែងថា កម្ពុជា នឹងចាកចេញពីប្រទេសដែល​មាន​ចំណូលអភិវឌ្ឍន៍តិចតួចទៅជាប្រទេសដែលមានចំណូលមធ្យមកម្រិតខ្ពស់នាពេលឆាប់ៗខាងមុខ។ សម្ដេចអះអាងថា៖ «អ្វីដែលជាការព្រួយបារម្ភរបស់ខ្ញុំ គឺនៅពេលដែល​យើង​ចាកចេញពីប្រទេសដែលមានប្រាក់ចំណូលតិចតួច។ ពេលដែលយើងចាក​ចេញពីប្រទេសដែលអភិវឌ្ឍន៍តិចតួចគឺការខ្ចីប្រាក់ពីបណ្ដាប្រទេស​និងធនាគារនានាវាលែងជា​ការប្រាក់សម្បទានទៀតហើយវាគឺជាការប្រាក់ពាណិជ្ជកម្ម»។ សម្តេចបានបានលើកឡើងថា សម្តេចនៅតែបន្តអំពាវនាវឱ្យ​បណ្ដាប្រទេសដែលជាម្ចាស់កម្ចីជាដូចជាចិន ជប៉ុន កូរ៉េខាងត្បូង សូមឱ្យបន្តផ្ដល់ប្រាក់​កម្ចី​ដែលមានការប្រាក់សម្បទានដល់កម្ពុជាបន្តទៀត។ សម្ដេចតេជោបានបន្ដថា ហេតុដូច្នេះ​ហើយបានជាការកសាងផ្លូវល្បឿនលឿន ឬ ផ្លូវរទេះភ្លើងល្បឿនលឿនកម្ពុជាចង់ឱ្យ​មាន​ការវិនិយោគបែប BOT ។ សម្តេចតេជោបានបន្ថែមថា ក្នុងពេលជួបជាមួយនឹងប្រធាន​ទីភ្នាក់ងារអភិវឌ្ឍន៍បារាំង សម្ដេចក៏បានស្នើឱ្យក្រុមហ៊ុនបារាំងវិនិយោគតាមរបៀប BOT លើផ្លូវ​រថភ្លើងល្បឿនលឿន។ សម្ដេចក៏បានបញ្ជាក់ទៀតថា នៅពេលខាងមុខយើងក៏នឹងបើកការដ្ឋានសាងសង់ផ្លូវល្បឿនលឿនពីភ្នំពេញភ្ជាប់ទៅព្រំដែនវៀតណាម ហើយខាងវៀតណាម​ក៏នឹងធ្វើ​ការ​សងសាងផ្លូវល្បឿនលឿនភ្ជាប់ពីទីក្រុងហូជីមិញ មកព្រំដែនផងដែរ៕AKP