រុស្ស៊ី​ថា​​រដ្ឋ​បាល់​ទិក'ឈ្លានពាន'

រុស្ស៊ីជឿថារដ្ឋបាល់ទិកនិងប៉ូឡូញកំពុងប្រកាន់យក“ជំហរឈ្លានពានខ្លាំង”បន្ទាប់ពីប្រធានាធិបតីលីទុយអានីបានអំពាវនាវឱ្យមានការជួយជ្រោមជ្រែងប្រយុទ្ធសម្រាប់អ៊ុយក្រែន។លោក Dmitry Peskov អ្នកនាំពាក្យវិមានក្រឹមឡាំងបាននិយាយថា "ជាទូទៅ យើងឃើញថាតំណាងនៃរដ្ឋបាល់ទិកនិងប៉ូឡូញកំពុងប្រកាន់ជំហរយ៉ាងម៉ឺងម៉ាត់បំផុត។ ថ្ងៃនេះPeskov បានធ្វើអត្ថាធិប្បាយបន្ទាប់ពីប្រធានាធិបតីលីទុយអានី Gitanas Nauseda កាលពីថ្ងៃទី៣០ខែមករាបានអំពាវនាវឱ្យអង្គការណាតូបញ្ឈប់ការកំណត់ "បន្ទាត់ក្រហម"និងផ្តល់ឧបករណ៍ទាំងអស់ដែលអ៊ុយក្រែនត្រូវការរួមទាំងយន្តហោះចម្បាំងនិងមីស៊ីលរយៈចម្ងាយឆ្ងាយ។លោក Peskov បានបន្ថែមថា“វាជារឿងគួរឲ្យសោកស្ដាយខ្លាំងណាស់ដែលមេដឹកនាំនៃមហាអំណាចអឺរ៉ុប ដែលជាក្រុមដឹកនាំដំណើរការទាំងអស់នៅក្នុងទ្វីបអឺរ៉ុបមិនបានចាត់វិធានការតបតវិញ”។Nausedaបានធ្វើការអំពាវនាវនេះបន្ទាប់ពីសហរដ្ឋអាមេរិកនិងអាល្លឺម៉ង់បានប្រកាសកាលពីសប្តាហ៍មុនថាពួកគេនឹងបញ្ជូនរថក្រោះប្រយុទ្ធសំខាន់ៗទៅកាន់អ៊ុយក្រែនដើម្បីជួយក្នុងជម្លោះរបស់ខ្លួនជាមួយរុស្ស៊ី។ រដ្ឋបាល់ទិកទាំង៣ លីទុយអានី ឡាតវី និងអេស្តូនី សុទ្ធតែគាំទ្រអ៊ុយក្រែន។អ៊ុយក្រែន​កំពុង​កំណត់​គោលដៅ​លើ​យន្តហោះ​ចម្បាំង​ទំនើប​ពី​សម្ព័ន្ធមិត្ត​លោក​ខាង​លិច បន្ទាប់ពី​ទទួល​បាន​ការ​ប្តេជ្ញាចិត្ត​ចំពោះ​រថក្រោះ។ បច្ចុប្បន្ន អ៊ុយក្រែន​ប្រតិបត្តិការ​កង​យន្តហោះ​ចម្បាំង​ពី​សម័យ​សូវៀត​ដែល​មាន​សមត្ថភាព​មិន​សូវ​ល្អ​បើ​ធៀប​នឹង​យន្តហោះ​លោក​ខាង​លិច​ទំនើប។ប្រទេសប៉ូឡូញមិនទាន់បានធ្វើសេចក្តីថ្លែងការណ៍ច្បាស់លាស់មួយស្តីពីការបញ្ជូនយន្តហោះចម្បាំង F-16 នោះទេ ។ប៉ុន្តែបានពិចារណាពីលទ្ធភាពនេះនៅក្នុងជុំបន្ទាប់នៃជំនួយយោធាដល់អ៊ុយក្រែន។ វ៉ារស្សាវ៉ានៅថ្ងៃទី៣០ខែមករាបាននិយាយថាខ្លួននឹងធ្វើការសម្រេចចិត្តក្នុងការសម្របសម្រួលយ៉ាងជិតស្និទ្ធជាមួយសម្ព័ន្ធមិត្តលោកខាងលិចរបស់ខ្លួន។វិមានក្រឹមឡាំងបាននិយាយកាលពីសប្តាហ៍មុនថា រុស្ស៊ីចាត់ទុកការសន្យាផ្តល់ជំនួយរថក្រោះពីសហរដ្ឋអាមេរិក និងអឺរ៉ុបជាភស្តុតាងនៃការចូលរួមដោយផ្ទាល់កាន់តែខ្លាំងឡើងរបស់បស្ចិមប្រទេសនៅក្នុងសង្គ្រាមអ៊ុយក្រែន។ Peskov ធ្លាប់បានព្រមានថា "រថក្រោះអាល្លឺម៉ង់នឹងឆេះនៅលើសមរភូមិអ៊ុយក្រែនដូចសព្វាវុធរបស់លោកខាងលិច"៕យោងតាមReuters

លោក Dmitry Peskov អ្នកនាំពាក្យវិមានក្រឹមឡាំង។AFP