សម្ដេចហ៊ុនសែ​ន៖គ​ណបក្សប្រជាជនកម្ពុជា​នឹងធ្វើមហាសន្និបាត​វិសាមញ្ញនៅចុង​សប្ដាហ៍នេះ

សម្ដេចហ៊ុនសែននាយករដ្ឋមន្ត្រីនៃកម្ពុជានិងជាប្រធានគណបក្សប្រជាជនកម្ពុជាបានថ្លែងថា គណបក្សប្រជាជនកម្ពុជានឹងធ្វើ​មហា​សន្និបាតវិសាមញ្ញរបស់ខ្លួន រយៈពេល២ថ្ងៃ(ពីថ្ងៃទី២៨ ដល់ថ្ងៃទី២៩ខែមករាឆ្នាំ២០២៣)នៅចុងសប្ដាហ៍នេះដើម្បីជជែករៀបចំក្របខណ្ឌគោលនយោបាយ២០២៣-២០២៨។ការថ្លែងរបស់សម្ដេចនេះ ក្នុងឱកាសអញ្ជើញជាអធិបតី ក្នុងពិធីប្រគល់សញ្ញា​បត្រជូននិស្សិតសាកលវិទ្យាល័យវេស្ទើន ប្រមាណជាង ៣ ០០០ អង្គ/នាក់ នៅមជ្ឈ​មណ្ឌល​​សន្និបាត និងពិព័រណ៍អន្តរជាតិជ្រោយចង្វារ  នាព្រឹកថ្ងៃទី២៦ ខែមករា ឆ្នាំ២០២៣។សម្ដេចហ៊ុន សែន មានប្រសាសន៍ថា គណបក្សប្រជាជនកម្ពុជា នឹងរៀបចំ​កិច្ចប្រជុំចុងសប្ដាហ៍នេះ នៅថ្ងៃសៅរ៍ និងថ្ងៃអាទិត្យ គឺរយៈពេល២ថ្ងៃ សម្រាប់គេហៅថាមហាសន្និបាតតំណាងទូទាំងប្រទេសរយៈពេល២ថ្ងៃ ដើម្បីជជែករៀបចំក្របខណ្ឌគោល​នយោបាយ២០២៣-២០២៨។ សម្ដេចបន្តថា  បញ្ហានេះមិនមែនអនុម័តដោយ​មនុស្ស​ម្នាក់ ពីរនាក់ឬមនុស្សបួន ដប់នាក់នោះទេ ដោយធ្វើការអញ្ជើញតាំងពីថ្នាក់ស្រុក​មក​ធ្វើការជួបប្រជុំ ផ្ដល់មតិទៅលើទិសដៅ ដែលត្រូវប្រកាន់យកក្នុងរយៈពេល៥ឆ្នាំទៅមុខហើយត្រូវប្រើទៅដល់មហាសន្និបាតតំណាងទូទាំងប្រទេសវិសាមញ្ញទៅទៀត។សម្ដេចគូសបញ្ជាក់ថា  ការរៀបចំក្របខណ្ឌគោលនយោបាយ២០២៣-២០២៨  មិនមែនជាការកំណត់ដោយ ហ៊ុន សែន ម្នាក់ឬត្រឹមតែសមាជិកអចិន្ត្រៃយ៍​ប៉ុន្មាន​នាក់ ឬគណៈកម្មាធិការកណ្ដាលនោះទេ តែនេះប្រមូលផ្ដុំនេះបញ្ញាញាណមនុស្សរាប់​ពាន់​នាក់ដែលតំណាងមកតាំងពីថ្នាក់ស្រុក ដើម្បីមកចូលរួមផ្ដល់នូវយោបល់សម្រាប់កម្ម​វិធី​នយោបាយ រយៈពេល៥ឆ្នាំទៅមុខ លើមូលដ្ឋានដែលមានរួចហើយ តើអ្វីដែលត្រូវកែ​សម្រួល។ សម្ដេចនាយករដ្ឋមន្ត្រីគូសបញ្ជាក់បន្ថែមថា ក្នុងនោះ បញ្ហាមនុស្ស ក្លាយ​ទៅជាបញ្ហាសំខាន់ជាងគេ ដូចដែលសម្ដេចធ្លាប់និយាយហើយថា ថវិកាឆ្នាំ២០២៣ គឺជា​ថវិកាបម្រើឱ្យមនុស្ស ដែលក្នុងនោះមានទាំងការតម្លើងបៀវត្ស ការធ្វើអន្ដរាគមន៍ជួយ​ចំពោះ​អ្នកក្រីក្រដែលជួបបញ្ហាកូវីដ បញ្ហាអតិថរណាជាដើម។ជាមួយគ្នានេះ សម្ដេចតេជោក៏បាន​លើក​ឡើងជាថ្មី អំពីគម្រោងនឹងបណ្ដុះបណ្ដាល​យុវជន១លាន៥សែននាក់ ហើយពេលចូល​រៀនមិនត្រឹមតែមិនបង់ប្រាក់ទេ តែរដ្ឋផ្ដល់​ប្រាក់​ឧបត្ថម្ភឱ្យ ដើម្បីយើងមានធនធានមនុស្សបម្រើឱ្យសេចក្ដីត្រូវការនៃការវិនិយោគ​ពី​ខាងក្រៅ ខណៈដែលបច្ចុប្បន្នកម្ពុជា បានក្លាយជាគោលដៅនៃការវិនិយោគទាក់ទាញពី​ខាងក្រៅ​នោះ៕AKP