ទីបំផុត​ Elon Musk ទិញយកបណ្តាញសង្គមយក្ស Twitter ជាផ្លូវការ ក្នុងតម្លៃមហាសាល

Elon Musk បានបញ្ចប់ការទិញយកទាំងស្រុងនូវបណ្តាញសង្គមយក្ស Twitter ក្នុងចំនួនទឹកប្រាក់ ៤៤ពាន់លានដុល្លារ។

នាយកប្រតិបត្តិ និងនាយកហិរញ្ញវត្ថុរបស់ Twitter ត្រូវបានគេរាយការណ៍ថាបានចាកចេញហើយ។ លោក Musk បានបង្ហោះសារថា ការចាប់អារម្មណ៍របស់គាត់ចំពោះវេទិកានេះ មិនមែននិយាយអំពីការរកលុយនោះទេ។ វិនិយោគិន Twitter លោក Ross Gerber ដែលជានាយកប្រតិបត្តិក្រុមហ៊ុន Gerber Kawasaki Investments នៅរដ្ឋកាលីហ្វ័រញ៉ា បានបញ្ជាក់ប្រាប់ BBC ថាកិច្ចព្រមព្រៀងនេះត្រូវបានបញ្ចប់ហើយ។

នាយកប្រតិបត្តិរបស់ក្រុមហ៊ុន លោក Parag Agrawal និងជាប្រធានផ្នែកហិរញ្ញវត្ថុ Ned Segal លែងនៅជាមួយក្រុមហ៊ុនទៀតហើយ។ នេះបើយោងតាមរបាយការណ៍របស់ប្រព័ន្ធផ្សព្វផ្សាយអាមេរិក។ សហស្ថាបនិក Twitter លោក Biz Stone បានថ្លែងអំណរគុណដល់លោក Agrawal លោក Segal និងនាយកប្រតិបត្តិផ្នែកច្បាប់ និងគោលនយោបាយកំពូលរបស់ក្រុមហ៊ុន លោក Vijaya Gadde ដែលត្រូវបានគេរាយការណ៍ថាបានចាកចេញពីក្រុមហ៊ុនផងដែរ សម្រាប់ "ការរួមចំណែកដ៏ធំ" របស់ពួកគេចំពោះអាជីវកម្មនេះ៕