កម្ពុជា-វៀតណាមគ្រោងបើកច្រកអន្តរជាតិនៅត្រង់តំបន់កោះថ្ម X16 ខេត្តត្បូងឃ្មុំ
ខេត្តត្បូងឃ្មុំ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ឲ្យដឹងថា កម្ពុជា និងវៀតណាមគ្រោងនឹងបើកច្រកអន្តរជាតិនៅត្រង់តំបន់កោះថ្ម X ១៦ ស្ថិតនៅក្នុងខេត្តត្បូងឃ្មុំមួយទៀត ដែលផ្តល់ប្រយោជន៍ពីគ្នាច្រើន ។
ការបញ្ជាក់បែបនេះ ខណៈសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកនាយករដ្ឋមន្ត្រីវៀតណាម អញ្ជើញជាអធិបតីខួបលើកទី៤៥ នៃទិវាការចងចាំដំណើរឆ្ពោះទៅកាន់ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២២) និងសម្ពោធសមិទ្ធផលនានានៅតំបន់ប្រវត្តិសាស្ត្រយោធា តេជោកោះថ្ម X16 ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នៅថ្ងៃទី២០ មិថុនា ឆ្នាំ២០២២ ។
សម្តេចតេជោ ហ៊ុន សែន បានគូសបញ្ជាក់ថា ៖«ខ្ញុំ និងឯកឧត្តមផាម មិញជិញ នាយករដ្ឋមន្ត្រីវៀតណាម មានគម្រោងថា ថ្ងៃក្រោយនៅមានពេលវេលាសមស្របយើងអាចបើកច្រកនេះទៅជាច្រកអន្តរជាតិមួយ ។ យើងត្រូវបំពេញកិច្ចការការងារមួយចំនួនទាក់ទិននឹងការកសាង និងនីតិវិធី ដើម្បីឈានទៅបើកច្រកព្រំដែនឲ្យទៅជាច្រកព្រំដែនអន្តរជាតិ»។
សម្តេចតេជោ ក៏បានលើកឡើងថា បើសិនបើកច្រកព្រំដែនអន្តរជាតិនេះនឹងធ្វើឲ្យកម្ពុជា-វៀតណាមនឹងធ្វើទំនាក់ទំនងកាន់តែជិតស្និទជាមួយច្រកពាណិជ្ជកម្ម ដែលប្រទេសទាំង២កាន់តែមានការរីកចម្រើនកាន់ខ្លាំង ។
សម្តេចតេជោ ក៏បានអរគុណដល់ប្រជាជនវៀតណាមដែលបានជួយដល់ប្រជាជនកម្ពុជាពិសេសសម្តេចនៅពេលរត់ទៅចូលក្នុងទឹកដីវៀតណាម ។ សម្តេចបញ្ជាក់ថា ៖«យើងមិនអាចភ្លេចពាក្យបុរាណខ្មែរថា«ជួយគ្នាក្នុងគ្រាក្រ ស្គាល់មិត្តល្អក្នុងគ្រាលំបាក» នេះហើយដែលបញ្ហាដែលយើងមិនអាចបំភ្លេចបាននូវគុណបំណាច់ដែលវៀតណាមធ្វើដាក់កម្ពុជា» ។
គួររំលឹកថា នៅថ្ងៃទី២០ ខែមិថុនា ឆ្នាំ២០២២ នេះគឺជាខួបគម្រប់ ៤៥ឆ្នាំនៃដំណើរតស៊ូឆ្ពោះទៅរកការរំដោះជាតិរបស់សម្តេចតេជោ ហ៊ុន សែន និងយុទ្ធមិត្ត ដើម្បីរំដោះជាតិ និងប្រជាជនកម្ពុជាចេញពីការកាប់សម្លា.ប់របស់ខ្មែរក្រហម ។ ថ្ងៃទី២០ ខែមិថុនា ឆ្នាំ១៩៧៧ ជាពេលដែលសមមិត្ត ហ៊ុន សែន ក្នុងវ័យ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ ៤រូបផ្សេងទៀតបានសម្រេចចិត្តក្នុងស្ថានភាពដ៏តាន់តឹងបំផុតលាចាកទឹកដីលាចាកឧត្តមភរិយា និងកូនក្នុងផ្ទៃជាទីស្រឡាញ់ធ្វើដំណើរជ្រែកស្បៃរាត្រីឆ្លងកាត់ព្រំដែនទាំងគ្រោះថ្នាក់បំផុតឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជាចេញពីក្រញាំបិសាចដ៏សែនឃោ.ឃៅ ប៉ុលពត ។
តើមចេញពីដំណើរតស៊ូជាមួយទឹកចិត្តដ៏មុះមុតនោះហើយទើបនាំឱ្យមានការរំដោះប្រទេសជាតិ និងប្រជាជនកម្ពុជា ចេញពីរបបវាលពីឃាត ប៉ុល ពត នៅថ្ងៃទី០៧ ខែមករា ឆ្នាំ១៩៧៩ ហើយឈានឆ្ពោះទៅរកការបិទបញ្ចប់ភ្លើងសង្គ្រាមបិទបញ្ចប់ការបែកបាក់ជាតិនាំមកនូវការបង្រួបបង្រួមជាតិ ឯកភាពជាតិ និងការកសាងអភិវឌ្ឍប្រទេសឱ្យរីកចម្រើនដូចពេលបច្ចុប្បន្ន ។
ដើម្បីរំលឹកដល់ស្លាកស្នាមប្រវត្តិសាស្ត្រដ៏មានគុណតម្លៃសម្រាប់ជាតិ និងប្រជាជន និងដើម្បីគាស់រំលើងឱ្យឃើញនូវវីរភាពរបស់កុលបុត្រខ្មែរក្នុងការតស៊ូដើម្បីជាតិ និងប្រជាជនសម្រាប់កុលបុត្រខ្មែរជំនាន់ក្រោយនោះ នៅឆ្នាំ២០១៧ ដែលជាខួប៤០ឆ្នាំនៃការចេញតស៊ូនេះ សម្តេចតេជោ ហ៊ុន សែន រួមនឹងយុទ្ធមិត្តដែលនៅមានជីវិតបានធ្វើដំណើររួមគ្នាទៅកាន់គ្រប់ចំណុចក្នុងដំណាក់កាលតស៊ូនោះ ។
ចាប់តាំងពីឆ្នាំ២០១៧នោះមក ក្រសួងការពារជាតិ ក៏បានទទួលភារកិច្ចរៀបចំប្រារព្ធពិធីមួយនេះជារៀងរាល់ឆ្នាំ ។ បន្ថែមពីលើនោះ ក៏មានការរៀបចំសាងសង់នូវសំណង់នានា នៅលើតំបន់ប្រវត្តិសាស្ត្រមួយនេះផងដែរ ដើម្បីតម្កល់ទុកជាមរតកដល់មនុស្សជំនាន់ក្រោយ៕
/unnamed.png
Post a Comment