ក្រោយស្ពានត្រូវកាត់ផ្តាច់ព្រោះទឹកហូរខ្លាំងភ្ញៀវទេសចរទៅលេងទឹកធ្លាក់ថ្មក្រាលជាប់គាំងស្ទះចរាចរណ៍
ក្រោយពីទទួលព័ត៌មានថា ភ្ញៀវទេសចរដែលបានទៅលេងទឹកធ្លាក់ថ្មក្រាល ស្ថិតក្នុងឃុំជៀបស្រុកទឹកផុស ជាប់គាំងស្ទះចរាចរណ៍មិនអាចត្រឡប់មកវិញបាន ដោយសារតែស្ពានបណ្ដោះអាសន្នឆ្លងកាត់ទំនប់ចាក់ទឹម ត្រូវបានកាត់ផ្ដាច់ ដោយសារតែទឹកហូរ កាលពីរសៀលថ្ងៃទី២៤ ខែកញ្ញា ឆ្នាំ២០២២នោះ ឯកឧត្តម ស៊ុន សុវណ្ណារិទ្ធិ អភិបាលខេត្ត រួមដំណើរដោយលោកជំទាវ កែវ ចន្ទមុន្នី អ្នកតំណាងរាស្ត្រមណ្ឌលកំពង់ឆ្នាំង បានដឹកនាំក្រុមការងារចុះទៅពិនិត្យដល់កន្លែងកើតហេតុ។
ក្នុងស្ថានភាពដ៏លំបាកខាងលើនេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក៏បានបញ្ជាទៅកងកម្លាំង មានសមត្ថកិច្ច អាជ្ញាធរគ្រប់ជាន់ថ្នាក់ ដើម្បីបញ្ជូនកម្លាំងចុះអន្តរាគមន៍ជាបន្ទាន់។ ក្រោយពេលកម្លាំងសមត្ថកិច្ចបានទៅដល់ និងបានធ្វើការជួសជុលស្ពាន រហូតដល់ម៉ោងប៉ុន្មានជាង៧យប់ ស្ពានដែលរងការខូចខាតត្រូវបានជួសជុលរួចរាល់ជាស្ថាពរ ដែលអាចឲ្យភ្ញៀវទៅលេងទឹកធ្លាក់ថ្មក្រាល បានធ្វើដំណើរឆ្លងកាត់មកវិញដោយសុវត្ថិភាព។
ភ្ញៀវទេសចរបានសម្ដែងទឹកចិត្តសប្បាយរីករាយជាខ្លាំង និងបានលើកដៃសំពះថ្លៃងអំណរគុណដល់ឯកឧត្តមអភិបាលខេត្ត ដែលបានយកចិត្តទុកដាក់ដោះស្រាយបន្ទាន់ជូនពួកគាត់ទាន់ពេលវេលា ធ្វើឲ្យគាត់អាចធ្វើត្រឡប់មកលំនៅឋានវិញដោយសុវត្ថិភាព។
ជាមួយគ្នានោះ ឯកឧត្តម អភិបាលខេត្តកំពង់ឆ្នាំង បានថ្លែងអំណរគុណដល់កងកម្លាំងសមត្ថកិច្ចគ្រប់ផ្នែក គ្រប់ជាន់ថ្នាក់ ដែលបានសហការគ្នាក្នុងការយកចិត្តទុកដាក់ជួសជុលស្ពានឆ្លងកាត់ទំនប់ចាក់ទឹម ជាបណ្ដោះអាសន្ននេះទាន់ពេលវេលា ធ្វើឱ្យភ្ញៀវទេសចរអាចឆ្លងកាត់មកវិញបាន។
សូមរំឮកថា ទំនប់ចាក់ទឹម ក្នុងភូមិកោះខ្ទម ឃុំជៀប ស្រុកទឹកផុស គឺជាផ្លូវគមនាគមន៍ដ៏សំខាន់សម្រាប់ការធ្វើដំណើររបស់ប្រជាពលរដ្ឋនៅតំបន់នោះ ពិសេសសម្រាប់ភ្ញៀវទេសចរទៅលេងកំសាន្តនៅរម្មណីយដ្ឋាន ទឹកធ្លាក់ថ្មក្រាល។ ហើយទំនប់នេះ ត្រូវបានកាត់ផ្តាច់កាលពីវេលាម៉ោង១ជាងរំលងអធ្រាត្រឈានចូលថ្ងៃទី២០ ខែកក្កដា ឆ្នាំ២០២២ ហើយត្រូវបានក្រសួងធនធានទឹក អាជ្ញាធរ និងសហគមន៍ទេសចរណ៍ ទឹកធ្លាក់ថ្មក្រាល កសាងស្ពានបណ្តោះអាសន្ន ដែលអាចឱ្យភ្ញៀវទេសចរ និងប្រជាពលរដ្ឋ ធ្វើដំណើរបានជាធម្មតា។
ប៉ុន្តែនៅរសៀលថ្ងៃទី២៤ ខែកញ្ញា បន្ទាប់ពីទឹកហូរខ្លាំងពេក ធ្វើឱ្យស្ពានរងការខូចខាតជាថ្មីម្តងទៀតធ្វើឱ្យភ្ញៀវទេសចរ ជាប់គាំងមិនអាចត្រឡប់មកវិញបាន ដែលជាហេតុធ្វើឱ្យ ឯកឧត្តម អភិបាល លោកជំទាវ អ្នកតំណាងរាស្ត្រ ចុះអន្តរាគមន៍ជាបន្ទាន់ ហើយបានធ្វើដំណើរជាប្រក្រតីឡើងវិញ៕
/unnamed.png
Post a Comment