ឧទ្យានអាងចិញ្ចឹមត្រីលំដាប់ពិភពលោកកំពុងលេចរូបរាងក្នុងខេត្តមួយនៅកម្ពុជា
ជារឿងមួយដ៏គួរអោយចាប់អារម្មណ៍ និងភ្ញាក់ផ្អើលខ្លាំងមែនទែន ដោយថ្មីៗនេះ លេចចេញនៅកន្លែងកម្សាន្តដ៏ប្លែកភ្នែកថ្មីមួយមិនធ្លាប់មាន ជាពិសេសជាកន្លែងកម្សាន្តលំដាប់ពិភពលោក ហើយកុំច្រឡំថា នៅប្រទេសគេអោយសោះ ព្រោះថាវាកំពុងផុសឡើងក្នុងប្រទេសកម្ពុជាយើងតែម្ដង។
នេះបើយោងតាមប្រភពហ្វេសប៊ុកផេកផ្លូវការរបស់លោកជំទាវ ទាង អេង ភរិយា លោកអភិបាលខេត្តសៀមរាប ឯកឧត្តម ទៀ សីហា បានអោយដឹងថា «កុំច្រឡំថានៅស្រុកក្រៅ ពុកម៉ែ បងប្អូន នេះជាឧទ្យានអាងចិញ្ចឹមត្រីលំដាប់ពិភពលោក គ្រោងនឹងបើកនៅចុងខែ១០ឆ្នាំ ២០២២ នាពេលខាងមុខនេះហើយ ឧទ្យានមួយនេះស្ថិតនៅក្នុងខេត្តសៀមរាប ដើម្បីទាក់ទាញភ្ញៀវទេសចរឲ្យបានច្រើនអមជាមួយប្រាសាទអង្គរ» ។
លោកជំទាវ ទាង អេង បានលើកឡើងថា «ឧទ្យានមួយនេះ បង្កើតឡើងដោយ Angkor Wildlife and Aquarium អាងចិញ្ចឹមត្រី និងអាណាចក្រអង្គរ សួនសត្វ នឹងត្រូវសាងសង់លើផ្ទៃដីជាង ១០០ ហិកតា ជាមួយនឹងទុនវិនិយោគសរុប ៧០ លានដុល្លារអាមេរិក»។
លោកជំទាវសម្ដែងក្ដីរំភើបថា «ខ្ញុំមិននឹកស្មានថា ប្រទេសខ្មែរយើងឥឡូវជឿនលឿនមិនចាញ់ស្រុកគេទេ អ្វីៗក៏មានហើយទំនើបទៀត សំខាន់នោះគឺមានសន្តិភាព សុវត្ថិភាពគ្រប់ទីកន្លែង ល្បឿននៃការអភិវឌ្ឍនលឿនហួសពីការរំពឹងទុកទៅទៀត» ។ លោកជំទាវបានពោលពីចំណុចពិសេសៗនៅទីនោះថា «ខ្ញុំបានដើរមើលនៅក្នុងឧទ្យានមួយនេះ គឺមានចំណុចពិសេសជាច្រើន ៖ មួយ គឺខ្ញុំមិនធ្លាប់បានឃើញត្រីទឹកសាបដែលរស់នៅក្នុងទន្លេមេគង្គ ដែលមានរូបរាងប្លែកធំ គឺត្រីរាជ ទម្ងន់ដល់ទៅ ១០០គីឡូជាង និងកម្របានឃើញ ។ ទីពីរ មានអ្នកជំនាញមើលថែត្រី និងអភិរក្សត្រីប្លែកៗយ៉ាងយកចិត្តទុកដាក់ ។ ខ្ញុំគិតថា យើងគួរយកកូនៗមកលេងម្តង ហើយឲ្យពួកគាត់បានស្គាល់ថា នេះជាត្រីកម្ររបស់ខ្មែរយើង ។ ទីបី កន្លែងនេះនាំមកនូវការអប់រំសម្រាប់ប្រជាជនក្នុងស្រុក និងភ្ញៀវទេសចរអន្តរជាតិដែលមកទស្សនាខេត្តសៀមរាប។
លោកជំទាវបន្តថា «ទីនោះ ស្អាតប្លែកភ្នែករៀបរាប់មិនអស់ឡើយ ដូច្នេះសូមបងប្អូនអញ្ជើញមកទស្សនា ដោយផ្ទាល់វិញល្អជាង។ សូមអរគុណដល់បងប្រុស និងបងស្រី ដែលបានអញ្ជើញខ្ញុំ និងក្រុមគ្រួសារមកលេងនៅ Aquarium ហើយទទួលបានភាពកក់ក្តៅយ៉ាងពេញលេញ។ សៀមរាបផ្ទះខ្ញុំ សៀមរាបធ្វើបាន»។
យ៉ាងណាម៉ិញការបង្ហោះខាងលើនេះ យើងសង្កេតឃើញថា កំពុងទទួលបានការចាប់អារម្មណ៍ជាខ្លាំងពីសំណាក់បងប្អូនប្រជាជនខ្មែរយើង រហូតមានការស៊ែរចែករំលែកភ្លូកទឹកភ្លូកដីជាមួយពាក្យពេចន៍លើកសរសើរពីកន្លែងដ៏ស្រស់ស្អាតមួយនេះ និងនាំគ្នាអបអរសាទរផងដែរ។ ជាពិសេសនោះឃើញថា បងប្អូនយើងពិតជាចង់ទៅទស្សនាលេងកម្សាន្តទីនោះច្រើនខ្លាំងមែនទែន។
គួរបញ្ជាក់ផងដែរថា ឧទ្យានអាងចិញ្ចឹមត្រីលំដាប់ពិភពលោកមួយនេះ បង្កើតឡើងដោយ Angkor Wildlife and Aquarium អាងចិញ្ចឹមត្រី និងអាណាចក្រអង្គរ សួនសត្វ នឹងត្រូវសាងសង់លើផ្ទៃដីជាង ១០០ ហិកតា ជាមួយនឹងទុនវិនិយោគសរុប ៧០ លានដុល្លារអាមេរិក ដែលមានទីតាំងស្ថិតនៅក្នុងខេត្តសៀមរាប និងជាសមិទ្ធផលថ្មីរបស់កម្ពុជា ដែលនឹងគ្រោងនឹងបើកដំណើរការនៅចុងខែ១០ ឆ្នាំ២០២២ នាពេលខាងមុខ៕
/unnamed.png
Post a Comment