សម្តេចតេជោ ប្រកាសឱ្យ ខឹម វាសនា ចេញមុខមកបញ្ជាក់ថា «ជាអាយ៉ង» របស់សម្តេច ឬយ៉ាងណា?
ខេត្តសៀមរាប៖ ថ្លែងចេញពីស្រុកបន្ទាយស្រី ទឹកដីខេត្តសៀមរាបទីកន្លែងដែលអ្នកជឿលោក ខឹម វាសនា ប្រមូលផ្តុំគ្នាកន្លងមកដើម្បីគេចចេញពីអបិយជំនឿថានឹងមានទឹកលិចលង់ពិភពលោកនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកចំឈ្មោះ លោក ខឹម វាសនាថា គួរចេញមុខមកឆ្លើយតបការចោទប្រកាន់ថា មេបក្សជួងនេះជា «អាយ៉ង» របស់សម្តេចតេជោនោះ។
សម្តេចតេជោស្នើឲ្យលោក ខឹម វាសនា ចេញមុខបកស្រាយជាមួយអ្នកនិយាយថាសម្តេចឲ្យ បង្កើតឲ្យមានព្រឹត្តិការណ៍ជួបជុំនៅភ្នំគូលែន ក៏ដើម្បីបញ្ជាក់ភាពស្អាតស្អំរបស់សម្ដេចតេជោ ផងដែរ។ ព្រោះកាលពីពេលថ្មីៗនេះ មានអ្នកខ្លះបានចោទប្រកាន់ថា សម្ដេចជាអ្នកបញ្ជាឲ្យបង្កើតព្រឹត្តិការណ៍ ជួបជុំនោះឡើង។
ថ្លែងនៅក្នុងពិធីជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅ ឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា នៅព្រឹកថ្ងៃទី ១៣ ខែកញ្ញា ឆ្នាំ២០២២ សម្តេចបញ្ជាក់យ៉ាងដូច្នេះថា «ហើយអ្នកខ្លះ ខ្ញុំផ្តាំទៅលោក ខឹម វាសនា ឯកឧត្តម ខឹម វាសនា ដែលតាំងខ្លួនជាព្រះព្រហ្មនោះ។ មានការជម្រុញ លើកទឹកចិត្តថា វៃប្រហារខ្ញុំ ថាហេតុអីមិនបង្ក្រាប មិនចាប់ ខឹម វាសនា ដាក់គុក ឱ្យខឹម វាសនា ទៅធ្វើសមាធិ នៅក្នុងគុក ក៏បានដែរ។ នែ វាទៅអញ្ចែក វាឱ្យអនុសាសន៍ឯង ទៅចាប់ខឹម វាសនា ឱ្យធ្វើសមាធិ (ក្នុងគុក)។ អ៊ីចឹង វាចង់ប្រើ កម្លាំងយើងនេះទៅបង្ក្រាបបងប្អូន។ នេះគ្រាន់តែជាអបិយជំនឿទេ ការប្រមូលផ្តុំ»។
សម្តេចបានថ្លែងបន្តថា «ខ្ញុំមិនយកកម្លាំងទៅបង្ក្រាបកម្លាំងដែលគ្រាន់តែមក ជំនឿខុសរឿង។ អ៊ីចឹងខាងបងប្អូន ខឹម វាសនា ឯកឧត្តម ខឹម វាសនា គេបាននិយាយថា ខ្ញុំជាអ្នកបញ្ជា ឯកឧត្តម ដើម្បីធ្វើរឿងហ្នឹង អ៊ីចឹងឯកឧត្តម គួរតែឆ្លើយតប ឬអ្នកគាំទ្រ ឯកឧត្តម ខឹម វាសនា ឆ្លើយតប បើហ៊ុន សែន បញ្ជា ព្រះព្រហ្មបានហើយ អាហ្នឹងគឺល្អហើយ។ អ៊ីចឹងខ្ញុំនឹងធំជាង ព្រះព្រហ្ម ខឹម វាសនា?វាទៅជាឆ្កួតឡប់អ៊ីចឹងទៅណា?»
សម្តេចតេជោ ហ៊ុន សែន បានដាក់ចំឈ្មោះលោក ខឹម វាសនាថា «ដូច្នេះ ខ្ញុំអំពាវនាវទៅឯកឧត្តំ ខឹម វាសនា និងអ្នកគាំទ្រ ឆ្លើយតបត្រឡប់ទៅវិញ ព្រោះគេចោទ ថាខ្ញុំជាអ្នកបញ្ជា ឱ្យខឹម វាសនា បង្កើតព្រឹត្តិការណ៍ហ្នឹង ដើម្បីបង្វែរពីរឿងនេះ រឿងនោះ វាចោទទៅជាអ៊ីចឹង»។
«អ៊ីចឹងមានតែឯកឧត្តម ខឹម វាសនា ទេ តើឯកឧត្តម សុទ្ធចិត្តឱ្យគេចោទ ថាឯកឧត្តម ជាអាយ៉ងរបស់ខ្ញុំ? អ្នកគាំទ្ររបស់ឯកឧត្តម ជាអាយ៉ងរបស់ខ្ញុំ ឬក៏ឯកឧត្តមចេញមុខបដិសេធ? ខ្ញុំគ្រាន់តែលើកប៉ុណ្ណឹងទេ»៕
សូមរម្លឹកផងដែរថា តាំងពីថ្ងៃទី ២៣ រហូតមកមានពលរដ្ឋរាប់ពាន់ម៉ឺននាក់ រួមទាំងពលករមកពីក្រៅប្រទេសផងបានសម្រុកចូលមកកាន់ដីចម្ការ២កន្លែងនៅជើងភ្នំគូលែន ដែលជាទីកន្លែងមនុស្សជាច្រើនមកជួបជុំជាមួយលោក ខឹម វាសនា មេបក្សជួង បានឃោសនាប្រជាភិថុតបែបអបិយជំនឿថាពិភពលោកនឹងជន់លិចខ្ទេចខ្ទី គឺមានតែតំបន់ភ្នំគូលែនទើបមានសុវត្ថិភាព។ ពលរដ្ឋមួយចំនួនដែលជឿលង់លើលោក ខឹម វាសនា បានបោះបង់ចោលផ្ទះសំបែង ការងារ និងមុខរបរទៅប្រមុខផ្តុំគ្នានៅដីចម្ការ នៅជើងភ្នំគូលែននេះ ។ ការប្រមូលផ្តុំគ្នានេះដែល បើតាមអាជ្ញាធរខេត្តសៀមរាប បានបញ្ជាក់ថាបាន ធ្វើឲ្យប៉ះពាល់ដល់សណ្តាប់ធ្នាប់សាធារណៈ សុវត្ថិភាព និងសុខភាពពលរដ្ឋ ហើយក្មេងៗ មិនត្រឹមតែមិនបានទៅសាលារៀនទេ តែក៏មានបញ្ហាប្រឈមច្រើនដូចមនុស្សដែលមានវ័យចំណាស់ដែរ។
/unnamed.png
Post a Comment