កម្ពុជាទទួលបានភ្ញៀវដើរកម្សាន្តកើនឡើងប្រមាណ៤៧.៣% នៅចុងសប្ដាហ៍មុន
តាមការជូនដំណឹងរបស់ក្រសួងទេសចរណ៍ នៅសប្ដាហ៍មុន កម្ពុជាទទួលបានកំណើនភ្ញៀវដើរកម្សាន្តនៅក្នុងស្រុកនាចុងសប្ដាហ៍កើនប្រមាណជាង ៤៧% ធៀបនឹងសប្ដាហ៍មុន។
តួលេខរបស់ក្រសួងទេសចរណ៍ កាលពីថ្ងៃចុងសប្តាហ៍មុន ត្រូវនឹងថ្ងៃទី១៧-១៨ ខែកញ្ញា ឆ្នាំ២០២២ បានឲ្យដឹងថា តួលេខនៅទូទាំងប្រទេស កម្ពុជាទទួលបានភ្ញៀវសរុប ៣០០,៣៨៥នាក់ ក្នុងនោះភ្ញៀវជាតិ២៤៦,៩៦០នាក់ និងភ្ញៀវបរទេសផ្ទៃក្នុង៥៣,៤២៥នាក់។ គោលដៅទេសចរណ៍សំខាន់ៗ រួមមាន៖
រាជធានីភ្នំពេញ ៦៩,៤០៤នាក់
ខេត្តព្រះសីហនុ ២៩,៤២២នាក់
ខេត្តកណ្តាល ២៥,០៩៣នាក់
ខេត្តសៀមរាប ២៤,៥៧៧នាក់
ខេត្តកំពត ២២,៥៥៥នាក់
ខេត្តបាត់ដំបង ២០,១៩០នាក់
ខេត្តកំពង់ចាម ១៩,៩៤៩នាក់
ខេត្តកំពង់ស្ពឺ ១៣,២៩៨នាក់
ខេត្តកែប ១២,៥១៩នាក់
ខេត្តពោធិ៍សាត់ ១២,០៣៧នាក់។
នាចុងសប្តាហ៍កន្លងមក មានប្រជាពលរដ្ឋជាច្រើនបានចេញទៅដាក់បិណ្ឌនៅតាមវត្តអារាមនានា និងបន្តចេញទៅដើរកម្សាន្តនៅតាមរមណីយដ្ឋាននានា ហើយស្ថានភាពចរាចរណ៍នៅតាមដងផ្លូវជាតិមួយចំនួនក៏មានសភាពកកកុញផងដែរ។
ក្រសួងទេសចរណ៍បានដាក់ចេញសារាចរណែនាំមួយកាលពីថ្ងៃទី១៣ ខែកញ្ញា ឆ្នាំ២០២២ ទៅដល់មន្ទីរទេសចរណ៍ និងផ្នែកពាក់ព័ន្ធ ដើម្បីបន្តពង្រឹងការអនុវត្តវិធានសុវត្ថិភាព និង SOP ទប់ស្កាត់ការរីករាលដាលជំងឺកូវីដ-១៩ ការពង្រឹងគុណភាពសេវាកម្មទេសចរណ៍ រក្សាតម្លៃសមរម្យ បរិស្ថានអនាម័យ និងបញ្ជៀសការជួបជុំកកកុញខ្លាំងនៅតាមគោលដៅទេសចរណ៍នានាដូចដែលធ្លាប់កើតមាននាឆ្នាំកន្លងមក៕
/unnamed.png
Post a Comment